ޔުއެފާ ޗެމްޕިއަންސް ލީގުގެ ސެމީ ފައިނަލުގައި ވިޔަރެއާލާ ދެކޮޅަށް ކުޅުނު ފުރަތަމަ ލެގުގެ މެޗު ކާމިޔާބުކޮށް، ފައިނަލާ ގާތަށް ލިވަޕޫލް ޖެހިލައިފިއެވެ.
ލިވަޕޫލްގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 2-0 ގެ ނަތީޖާއަކުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލެވެ. މިމެޗްގައި ލިވަޕޫލުން މޮޅު ކުޅުމެއް ދައްކާ މެޗްގެ ބޮޑު ބައި ކޮންޓްރޯލް ކުރި ނަމަވެސް ވިޔަރެއާލްއިންވަނީ ވަރަށް ރަނގަޅަށް ޑިފެންޑް ކޮށް ލިވަޕޫލްގެ ގިނަ ހަމަލާތަކެއް ބޭކާރުކޮށްލާފައެވެ.
މިގޮތުން މިމެޗްގެ ފުރަތަމަ ހާފްގައި ވިޔަރެއާލއިންވަނީ ލިވަޕޫލެއް ލަނޑެއް ޖެހުނަ ނުދީ ހިފަހައްޓާލާފައެވެ. އަދި ދެވަނަ ހާފްގައި މިމެޗްގެ ފުރަތަމަ ލަނޑަކީވެސް މެޗްގެ 53 ވަނަ މިނެޓްގައި ލިވަޕޫލްގެ ކެޕްޓަން ޖޯޑަން ހެންޑަސަން ގޯލް ކުރިމައްޗަށް ހުރަސްކުރަން އުޅުނު ބޯޅައެއް ވިޔަރެއާލްގެ ޕަރވިސް އެސްޓޫޕިނާން ގައިގާ ޖެހިފައި މިސްރާބު ބަދަލުވެގެން ގޮސް ވަން ބައިގޯލެކެވެ. އަދި މިލަނޑު ޖެހިތާ ދެ މިނެޓްފަހުން ލިވަޕޫލަށް އެޓީމްގެ ލީޑު ފުޅާކޮށްދިނީ ސާޑިއޯ މާނޭއެވެ. މިމެޗްގައި ވިޔަރެއާލްއަަށް ލިވަޕޫލްގެ ގޯލަށް އަމާޒުކޮށް އެންމެ ހަމަލާއެއްވެސް އުފެއްދިފައެއް ނުވެއެވެ.
މިކާމިޔާބީއާއެކު ސެމީފައިނަލްގެ ދެވަނަ ލެގަށް ނިކުންނައިރު ލިވަޕޫލަށް ބޮޑު އެޑްވާންޓޭޖެއް އޮތް ކަމަށް ގިނަބަޔަކަށް ގަބޫލް ކުރެއެވެ. އެންމެ ބޮޑު އެއްސަބަބަކީ ރޭގެ މެޗްގައި ލިވަޕޫލުން ދެއްކި މޮޅު ކުޅުމާއި ދެ ލަނޑުގެ ލީޑެއް ލިބިފައިވުމެވެ. މިދެތީމްގެ މެދުގައި ކުޅޭ ދެވަނަ ލެގް މިއަންނަ އަންގާރަ ދުވަހުގެ ރޭ ކުޅުމަށް ހަމަޖެހިފައިވަނީ ވިޔަރެއާލްގެ ދަނޑުގައެވެ. މިސީޒަންގައި ހަތަރު ތަށި ކާމިޔާބު ކުރުމުގެ ފުރުސަތު ލިބިފައިވާ ލިވަޕޫލްއަށް އެކަން ކާމިޔާބު ކުރުމުގެ އުންމީދު އަދިވެސް ވަރަށް ބޮޑަށް އެބައޮތެވެ.
