މިއީ ރާއްޖޭގައި ބޭރު ފައިސާ ގަނެވިއްކާ ރޭޓު ހިފެހެއްޓުމެއް ނެތި ދޫކޮށްލަންވީ ވަގުތުކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ. ނަޝީދު މިހެން ވިދާލުވީ، ރާއްޖޭގައި ޑޮލަރުގެ ކަޅު ބާޒާރު ބޮޑުތަކުން ވެއްޓިެއްޖެކަމަށް ލިޔެފައިވާ ލިޔުމެއް ހިމަނުއްވާ ކުރެއްވި ޓްވީޓެއްގައެވެ.
ރާއްޖޭގައި ޑޮލަރުގެ ކަޅު ބާޒާރުގައި ޑޮލަރުގެ ރޭޓު ރޯދައި ކުރިން ހުރީ 17.50ރ އާއި 17.70ރ ނޫނީ 17.80ރ އާއި ދެމެދުގެ ރޭޓެއްގައެވެ. ނަމަވެސް މިހާރު ވަނީ ވަރަށް ބޮޑަށް ރޭޓު ދަށްވެފައެވެ. މިގޮތުން 17ރ އިން ދަށަށް ވެއްޓި މިަދު ހުރީ 16.80ރގައެވެ.
ރައީސް ނަޝީދު ވިދާޅުވީ އެމަނިކުފާނަށް ފެނިވަޑައިގަންނަވާގޮތުގައި މިއީ ރާއްޖޭގެ ބޭރުފައިސާ ގަނެވިއްކާ ރޭޓު "ފްރީ ފްލޯޓް" ނުވަތަ ހިފެހެއްޓުމެއް ނެތި ދޫކޮށްލަންވީ ވަގުތުކަމަށެވެ. ނަޝީދު ވިދާޅުވީ، ޑޮލަރުގެ ކަޅު ބާޒާރު މުޅިން ނައްތާލެވިދާނެކަމަށެވެ.
މިދުވަސްވަރު ޑޮލަރުގެ ރޭޓު ދަށްވެފައިވާގޮތާއި ގުޅޭގޮތުން ވިޔަފާރިވެރިން ބުނަނީއާންމު ގޮތެއްގައި ވެސް މަހުގެ ކުރީކޮޅު ޑޮލަރުގެ އަގު ދަށަށްދާކަމަށެވެ. ނަމަވެސް މިފަހަރު އެހާ ބޮޑަށް ދަށްވެފައިވަނީ ބާޒާރުގައި ޑޮލަރު އިތުރުވުމުންކަމަށް ވިޔަފާރިވެރިން ބުނެއެވެ.
