މިއަހަރު ގަތަރުގައި ބާއްވާ ފީފާ ވޯލްޑްކަޕް ފުޓްބޯޅަ މުބާރާތުގެ ޖާގައެއް ހޯދުމަށް ޕޯޗުގަލް އިން ކުރާ މަސައްކަތަށް ފިޔަވަޅަކާއި ގާތަށް ޖެހިލައިފިއެވެ.
ފުޓުބޯޅައިގެ ގަދަ ބާރުގެ ގޮތުގައި ބެލެވޭ އިޓަލީ ޕްލޭ އޮފްގައި ރޭ ބަލިވުމުން، ޕްލޭ އޮފްގެ ފައިނަލުގައި ޕޯޗުގަލް އިޓަލީއާއި ދެކޮޅަށް ކުޅެން ނުޖެހޭނެކަން ވަނީ ކަށަވަރުވެފައެވެ. އަދި ވަރުގަދަ އިޓަލީ ވަނީ ވޯލްޑްކަޕުން ޖާގަ ގެއްލިފައެވެ.
ޕްލޭ އޮފްގައި ރޭ ޕޯޗުގަލް އިން ތުރުކީ ބަލިކުރީ 3-1 ގެ ނަތީޖާއަކުންނެވެ. މެޗުގައި ޕޯޗުގަލްގެ ތިން ލަނޑު ކާމިިޔާބުކޮށްދިނީ އޮޓާވިއޯ، ޑިއޮގޯ ޖޮޓާ، ނުނޭޒް އެވެ. ތުރުކީގެ ހަމައެކަނި ލަނޑު ކާމިޔާބުކޮށްދިނީ ޔިލްމާޒް އެވެ. ރޭގެ ޕްލޭ އޮފުން އިޓަލީ ބަލިކޮށް ފައިނަލަށް ދަތުރުކުރި ނޯތް މެސެޑޯނިއާއާއި، ޕޯޗުގަލް ބައްދަލުކުރާ ފައިނަލް އޮންނާނީ އަންގާރަ ދުވަހުގެ ރޭ ރާއްޖެގަޑިން 23:45 ގައެވެ. މި މެޗުން މޮޅުވާ ޓީމެއް ވޯލްޑްކަޕަށް ކޮލިފައިވާނެއެވެ.
މިމެޗުގެ އިތުރުން އަންގާރަ ދުވަހުގެރޭ ކޮލިފައިންގެ ފައިނަލް ބުރުގައި ޕޮލޭންޑާއި ސްވިޑަންވެސް ބައްދަލު ކުރާނެއެވެ. ޕޮލޭންޑް ފައިނަލް ބުރަށް ދިޔައީ ރަޝިޔާ މުބާރާތުން ވަކިކުރުމާއި ގުޅިގެންނެވެ. އަދި ފައިނަލް ބުރުގައި ވޭލްސް ބައްދަލުކުރަން ޖެހޭނީ ސްކޮޓްލޭންޑާއި ޔޫކްރެއިން ބައްދަލުކުރާ މެޗުން މޮޅުވާ ޓީމަކާާއެވެ. މި މެޗު ޔުއެފާއިން ވަނީ ފަސްކޮށްފައެވެ. ކުޅޭނެ ތާރީހެއް އަދި ހާމައެއް ނުކުރެއެވެ.
