ޤައުމީ ޕޭމަންޓް ސިސްޓަމްގެ ޤާނޫނުގެ ދަށުން ހަތަރު ފަރާތަކަށް ޕޭމަންޓް ޚިދުމަތް ދިނުމުގެ ލައިސަންސް، އެމްއެމްއޭއިން ދޫކޮށްފިއެވެ.
އެމްއެމްއޭއިން ބުނެފައިވަނީ އަލަށް ދޫކުރެވިގެން ދިޔަ މި ލައިސަންސްތަކުގެ ސަބަބުން ގިނަ ޕޭމަންޓް ޚިދުމަތްތަކެއް ރައްޔިތުންނަށް ލުއިފަސޭހަކަމާއިއެކު ފޯރުކޮށްދެވޭނެ މަގުފަހިވެގެން ދާނެކަމަށް ޤަބޫލުކުރާކަމަށެވެ.
ހުއްދަ ދިން ހަތަރު ކުންފުނިން ދޭނެ ހިދުމަތްތައް:
– ވީ.ޓީ.ޓީ. ފައިނޭންސް ޕްރައިވެޓް ލިމިޓެޑަށް ޕޭމަންޓް މުއާމަލާތްތައް އެކުއަޔަރކުރުމުގެ ޚިދުމަތް ދިނުމަށް
– ގްލޯބަލް ޕޭމަންޓްސް އޭޝިއާ-ޕެސިފިކް މޯލްޑިވްސް ޕްރައިވެޓް ލިމިޓެޑަށް ޕޭމަންޓް މުއާމަލާތްތައް އެކުއަޔަރކުރުމުގެ ޚިދުމަތް ދިނުމަށް
– ޕޭޔަރ ޕްރައިވެޓް ލިމިޓެޑަށް އިލެކްޓްރޯނިކް މަނީ އިޝޫކުރުމުގެ ޚިދުމަތް ދިނުމަށް
– ފަހިޕޭ ޕްރައިވެޓް ލިމިޓެޑަށް އިލެކްޓްރޯނިކް މަނީ އިޝޫކުރުމުގެ ޚިދުމަތް ދިނުމަށް
މި ލައިސަންސްގެ ދަށުން ވީ.ޓީ.ޓީ. ފައިނޭންސް ޕްރައިވެޓް ލިމިޓެޑްއިން އަދި ގްލޯބަލް ޕޭމަންޓްސް އޭޝިއާ-ޕެސިފިކް މޯލްޑިވްސް ޕްރައިވެޓް ލިމިޓެޑްއިން ދިނުމަށް ނިންމާފައިވާ ޕޭމަންޓް މުއާމަލާތްތައް އެކުއަޔަރކުރުމުގެ ޚިދުމަތަކީ މީގެ ކުރިން އެމްއެމްއޭއިން ދޫކޮށްފައިވާ ހުއްދައެއްގެ ދަށުން ދެމުން އަންނަ ޚިދުމަތެކެވެ.
