ސްޓްރެސް އަކީ ޖިސްމާނީ ނުވަތަ ނަފްސާނީ ގޮތުން ތިމާއަށް ކަންބޮޑުވުން ގެނުވާ ކަމަކާމެދު ފިކުރުކޮށް ހާސްވުމުގެ ސިފައެކޭ ބުނެވިދާނެއެވެ. ހަލަބޮލި ދިރިއުޅުމުގައި އަމިއްލަ ހަށިގަނޑާމެދު ފަރުވާ ކުޑަކޮށްލެވޭ ފަހަރު ވަރަށް ގިނައެވެ.
ސްޓްރެސް އުފެދެނީ ކަމަކާ ކުރިމަތިލާންޖެހުމުން ތިމާގެ ސިކުނޑީގައި އުފެދޭ "ފައިޓް އޯ ފްލައިޓް ރެސްޕޮންސް”"ގެ ސަބަބުންނެވެ.
ނިދި ހަމަކުރުން
އާންމު ގޮތެއްގައި މީހާ ހާސްވެ ކަންބޮޑުވުމުން ނުނިދި ވަރުބަލިވާގޮތް މެދުވެރިވެއެވެ. އެހެން ނަމަވެސް ހާސް ކަމާއި ކަންބޮޑުވުމުން ދުރުވުމަށް ނިދި ހަމަ ކުރަންވެސް ޖެހެއެވެ. ނިންޖަކީ ކޮންމެކަމެއް ކުރުމުގައިވެސް ވަރަށް މުހިއްމު ދައުރެއް އަދާކުރާ އެއްޗެކެވެ. ނުނިދާހުރެ ޖެހިގެން އަންނަ ދުވަހު އޮފީހަށް ނުވަތަ މަސައްކަތަށް ނުކުމެއްޖެނަމަ، އެއްވެސް ކަމެއް ރަނގަޅަކަށް ނުކުރެވޭނެއެވެ. އެހެންކަމުން، ރޭގަނޑު މަދުވެގެން 6 ގަޑިއިރު ނިދާށެވެ. އެންމެ ރަނގަޅީ 8 ގަޑިއިރުކަމަށް، ކަމުގެ މާހިރުން އަބަދުވެސް ބުނެއެވެ.
ކަސްރަތުކުރުން
ގަވާއިދުން ކަސްރަތުކުރުމަކީ ”ސްރްޓެސް“ އާއި ދެކޮޅަށް ހަށިގަނޑު މަސައްކަތްކުރަން އެހީތެރިވެދޭ ކަމެކެވެ. ސަބަބަކީ ކަސްތަރުކުރުމަކީ ސިކުނޑިއާއި، ލޭ ދައުރުކުރާ ނިޒާމަށް ފައިދާހުރި ކަމަކަށް ވާތީއެވެ. އަދި ސްޓްރެސްއާ ކުރިމަތިލާއިރު ދުޅަހެޔޮ ކާނާ ކެއުމަކީވެސް މުހިންމު ކަމެކެވެ. އޮފީސް މާހައުލުގައިވެސް ސްޓްރެސް އިން ދުރުވުމަށް ދޭތެރެ ދޭތެރެއިން ފަސް މިނިޓެއްހާއިރުގެ ކުޑަ ބްރޭކެއް ނަގާލުމަށްފަހު، ކުޑަ ކަސްރަތެއް ކޮށްލާށެވެ.
ވާހަކަތައް މިހާކާ ހިއްސާ ކުރުން
ކަމަކާ ފިކުރު ބޮޑުވާނަމަ ލަސްނުކޮށް ހެޔޮ އެދޭ ނުވަތަ އިތުބާރު ހިފޭ މީހަކާ އެކަމެއް ހިއްސާކޮށްލާ މަޝްވަރާކޮށްލާށެވެ. އެހެން ހެދުމުން ތިމާގެ ހިތަށް ކުޑަ ތަސައްލީއެއް ލިބިގެންދާނެއެވެ.
މެޑިޓޭޓްކުުރުން
"ސްޓްރެސް" ވުމުގެ ސަބަބުން ހިތް އަވަސްވެ، އަވަސް އަވަހަށް ކުރު ނޭވާލެވި، ލޭނާރުތަކުގައި ލޭއިތުރުވެ، އެ ނާރުތަކަށް ބާރުވެއެވެ. އެހެންކަމުން ފުން ނޭވައެއް ލެވިއްޖެނަމަ ސްޓްރެސްވުން ކުޑަ ކޮށްދެއެވެ. ސްޓްރެސްވާ ހާލަތްތަކުގެ ދޭތެރެ ދޭތެރެއިން ލޯ މަރާލުމަށްފަހު އަލުން ހުޅުވުމަކީ ސްޓްރެސް ފިލުވާލުމަށް ރަނގަޅު ގޮތެކެވެ.
ދީނީ ކަންކަމަށް ސަމާލުކަން ދިނުން
ތިމާގެ ވިސްނުން ބޭކާރު ކަންކަމަށް ގޮސް، ސްޓްރެސްއަށް ތިމާ ވެއްޓެނީ ގިނަފަހަރަށް ދީނީކަންކަމަށް ފަރުވާ ކުޑަކުރުމުގެ ސަބަބުންކަމަށް ގިނަ ދީނީ ޢިލްމުވެރީން ބުނެއެވެ. ގަވައިދުން ނަމާދު ކުރުމާއެކު އަޅުކަމުގައި ވަގުތު ހޭދަކުރުމަކީ ވެސް ސްޓްރެސްއިން ދުރުވުމަށް އެހީތެރި ވެދޭނެ ކަމެކެވެ.
