މ. މުލަކު ގެއަކުން ވައްކަން ކޮށްފައިވާ ކަމަށް ޖަނަވަރީ 17 ވަނަ ދުވަހު މުލަކު ޕޮލިސް ސްޓޭޝަނަށް ހުޅަހަޅާފައިވާ މައްސަލައަކާ ގުޅިގެން، އެ ގެއިން ވަގަށްނަގާފައިވާ ކަމަށް ބެލެވޭ ބައެއްތަކެތި ހޯދައި ވައްކަންކުރި ކަމުގެ ތުހުމަތުގައި މީހަކު ހައްޔަރުކޮށްފިއެވެ.
މުލަކު ޕޮލިސް ސްޓޭޝަނާއި ފުލުހުންގެ އިންޓެލިޖެންސް ގުޅިގެން ޖަނަވަރީ 24 ވަނަ ދުވަހު ހިންގި އެ އޮޕަރޭޝަނުގައި، ކޯޓު އަމުރެއްގެ ދަށުން ހައްޔަރުކޮށްފައިވަނީ 42 އަހަރުގެ ފިރިހެނެކެވެ.
އަދި އެ ގެއިން އޭނާ ވަގަށް ނަގާފައިވާ ކަމަށް ބެލެވޭ ތަކެތީގެ ތެރެއިން ކަރަންޓު ބުރުމާ އަކާއި ޓައިލް ކަޓަރާއި ސަރކިއުލަރ ކީހެއް ހޯދާފައިވެއެވެ. މިތަކެތީގެ ތެރެއިން ކަރަންޓު ބުރުމާ ހޯދާފައިވަނީ ނުއަގުގައި މީހަކަށް ވިއްކާލާފައިވަނިކޮށެވެ. އަދި ޓައިލް ކަޓަރާއި ސަރކިއުލަރ ކީސް ހޯދާފައިވަނީ ރަށުގެ ވަލުތެރޭގައި ފޮރުވާފައި ހުއްޓައެވެ.
މި މައްސަލަ މުލަކު ޕޮލިސް ސްޓޭޝަނުން އިތުރަށް ތަހުގީގު ކުރަމުންދާކަމަށް ފުލުހުން ވަނީ ބުނެފައެވެ.
