ރައީސް ނަޝިދުގެ ހުރުމަށް ދައުލަތުން ކުރާ ޚަރަދު އެމަނިކުފާނަށް ދެއްވާ ލިވިން އެލަވެންސުން އުނިކުރުމަށް މަޝްހޫރު ދީނީ ޢިލްމުވެރިޔާ ޑރ.މުޙައްމަދު އިޔާޒް ޢަބްދުއްލަޠީފް ގޮވާލައްވައިފިއެވެ. ޑރ.އިޔާޒް މިކަމަށް ގޮވާލެއްވީ ރައީސް ނަޝީދު ހުންނެވުމަށް ދައުލަތުން ހަމަޖައްސާފައިވާ ހޮޓެލް ޖެންއަށް ދައުލަތުން ދުވާލަކަށް 33 ހާސް ރުފިޔާ ޚަރަދުކުރާކަން ހާމަވުމާއި ގުޅިގެންނެވެ.
ރައީސް ނަޝީދު ޖެންގައި 21 ދުވަހު (ތިން ހަފުތާ) ގައި ނަޝީދު ހުންނެވުމަށް މިހާތަނަށް 698،168ރ. ވަނީ ހޭދަވެފައިވެއެވެ. މިއީ ބޭސްފަރުވާއަށް ފަހު އެމަނިކުފާނު ރާއްޖެ އިން ބޭރުން ވަޑައިގެންނެވި ފަހުން މިހާތަނަށް ހިނގާފައިވާ ހަރަދެވެ. ޖެންގައި އެމަނިކުފާނު ހުންނަވާ ގޮތަށް ހަމަޖައްސާފައި ވަނީ އަވަހާރަކޮށްލަން ދިން ބޮމުގެ ހަމަލާއާ ގުޅިގެން ސަލާމަތީ ސަބަބުތަކަކަށްޓަކަ އެވެ. މި ހޭދައިގެ ތެރޭގައި އެމަނިކުފާނުގެ ސެކިއުރިޓީ ބަލަހައްޓާ ސިފައިން ޖެންގައި ތިބުމުގެ ހޭދަ ހިމެނޭ ކަމެއް އަދި ޔަގީނެއް ނުވެއެވެ.
މިކަމަށް ފާޑުވިދާޅުވެ ޑރ.އިޔާޒް ވިދާޅުވީ، ރައީސް ނަޝީދުގެ ހުރުމަށް ދައުލަތުން ކުރާ ޚަރަދަކީ މަހެއްގެ މައްޗަށް 15000 ރުފިޔާއަށް ކުއްޔަށް އުޅޭ 60 އާއިލާގެ ބޯހިޔާވަހިކަންކަމަށެވެ. ރައްޔިތުންގެ ފައިސާ ޚަރަދުކުރުމުގައި މިއަށްވުރެ ޒިންމާދާރުވާން ވާނެކަމަށްވެސް ޑރ.އިޔާޒް ވިދާޅުވިއެވެ.
ސުބްޙާނަﷲ. ކޮންފަދަ ބޮޑު އިސްރާފެއްތޯ؟ މިފަދަ އިސްރާފުތައް ހުއްޓާލައިގެން މެނުވީ ބަޖެޓްގެ ދަރަނި ކުޑަ ނުކުރެވޭނެ. ރައީސް ނަޝީދުގެ ލިވިންގް އެލަވަންސަށް ސަރުކާރުން ދެއްވާ ބައިން މިބައި އުނިކުރަން ޖެހޭ.
– ޑރ.މުޙައްމަދު އިޔާޟް ޢަބްދުއްލަޠީފް
ރައީސް ނަޝީދު ހުންނެވުމަށް ހޮޓެލް ޖެންއަށް ދައުލަތުން މިހާ ބޮޑު ޚަރަދެއް ކުރަމުން އަންނައިރު، މިއަހަރުގެ މެއި މަހުގެ 6 ވަނަ ދުވަހު ރައީސް މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު ރާއްޖޭގައި ބޭރުގައި ކުރެއްވި ބޭސްފަރުވާއަށް 1.6 މިލިޔަން ރުފިޔާގެ ޚަރަދު ހިނގާފައިވާކަމަށްވެސް ފިނޭންސް މިނިސްޓްރީ ވަނީ ހާމަކޮށްފައެވެ.
މިދިޔަ މަހުގެ 11 ވަނަ ދުވަހު ނަޝީދު ރާއްޖެ އެނބުރި ވަޑައިގެންނެވިއިރު، އޭގެ ފަހުން އެމަނިކުފާނު ޖެންގައި ހުންނަވަނީ އެމަނިކުފާނު ހުންނެވުމަށް ދައުލަތުން ކަނޑައެޅި ވަގުތީ ގެކޮޅުގެ މަސައްކަތް ނުނިމޭތީއެވެ.
ނަޝީދުގެ ވަގުތީ ގެކޮޅުގެ ގޮތުގައި ހަމަޖެހިފައިވާ މުރައިދޫގޭގެ މަރާމާތުގެ މަސައްކަތްތައް ގެންދަނީ ސިފައިންގެ ކުންފުނި، ސިކްފޯއާ ހަވާލުކޮށްގެންނެވެ. ރައީސް ނަޝީދުގެ އިތުރުން އުއްތަމަ ފަނޑިޔާރަށްވެސް ރަސްމީ ގެކޮޅު ބިނާ ކުރަން ދެ ބިމެއް ސަރުކާރުން ހަމަޖެއްސިއެވެ. އެކަމަކު އެ ދެ ބިމުގެ މަސައްކަތް ލަސްވާނެތީވެ، ސަރުކާރުން ވަނީ މަޖިލީހުގެ ރައީސަށް މުރައިދޫގެ އަދި އުއްތަމަ ފަނޑިޔާރަށް ރެހެންދި ފްލެޓެއް ހަމަޖައްސައިފައެވެ.
