ހުޅުމާލޭގައި ދެވަނަ ފިޔަވަހީގައި ހަދަމުންދާ ޕޮލިސް ޕޯސްޓްގެ މަސައްކަތް ނިންމާ ވަރަށް އަވަހަށް ހިދުމަތް ފެށުމަށް ތައްޔާރުވަމުންދާ ކަމަށް ފުލުހުން ބުނެފިއެވެ.
ފުލުހުން ވިދާޅުވީ، ހިޔާ ފްލެޓްތައް ހިމެނޭ ސަރަހައްދުގައި ފުލުހުންގެ ޕޯސްޓެއް ހެދުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފުލުހުންނަށް ޖާގަ ހަަމަޖައްސައިދީފައިވާ ކަމަށާއި ގިނަ ދުވަސްތަކެއްނުވެ އެސަރަހައްދުގައި ޕޯސްޓް ހުޅުވައި ހިދުމަތް ދޭން ފެށޭވަރު ވާނެ ކަމަށެވެ.
ފުލުހުން ވިދާޅުވީ ޕޮލިސް ޕޯސްޓްގައި ފުލުހުން ގާއިމުވެ، ހިދުމަތް ދިނުމަށް ކުރަންޖެހޭ ކަންކަން މިހާރު ހިނގަމުންދާ ކަމަށެވެ. ހުޅުމާލޭގެ ދެވަނަ ފިޔަވަހީގައި ހަދަމުންދާ ޕޮލިސް ޕޯސްޓަށް ބޭނުންވާ ފަރުނީޗަރު ސަޕްލައިކޮށް ދިނުމަށް ވެސް މިހާރު ވަނީ ބަޔަކާ ހަވާލުކޮށްފައެވެ. އެގޮތުން އެ މަސައްކަތް ހަވާލުކޮށްފައިވަނީ އަމިއްލަ ކުންފުންޏެއް ކަމަށްވާ ބްރިލިއަންޓް ކޮމްޕެނީ ޕްރައިވެޓް ލިމިޓެޑަށެވެ.
ހިޔާ ފްލެޓްތަކަށް މީހުން ބަދަލުވާން ފަށާފައިވާއިރު، އެތަނުގައި ބައެއް ކަހަލަ ހިދުމަތްތައް ނެތުމުގެ ސަބަބުން އުނދަގޫތަކާއި ކުރިމަތިލާން ޖެހޭ ކަމަށް ގިނަ ބަޔަކު ވަނީ ބުނެފައެވެ. އެގޮތުން ފިހާރަތަކާއި ބަހުގެ ހިދުމަތުގެ އިތުރުން ސީސީޓީވޭ ކެމެރާތައް ނެތުމުގެ ޝަކުވާ މީގެ ކުރިން އެތަނަށް ބަދަލުވި ފަރާތްތަކުން ވަނީ ކޮށްފައެވެ.
