ލުބުނާނުގައި، ހިޒުބުﷲ ޖަމާއަތުން އިސްނަގައިގެން ކުރިޔަށްދިޔަ މުޒާހިރާއެއްގެ ތެރެއަށް ބަޔަކު ސްނައިޕަރުން ހަމަލާދީ، ބަދަލު ކުރެވުނު ބަޑީގެ ހަމަލާތަކުގައި 6 މީހަކު މަރުވެއްޖެއެވެ.
ލުބުނާނުގެ ވެރިރަށް ބޭރޫތުގައި ކުރިޔަށްދިޔަ މި އެއްވުމުގެ ތެރެއަށް ހަމަލާ ދިނުމުގެ ސަބަބުން، މުޒާހިރާއަށް ފަހުވެސް އެސިޓީގެ އެކި ހިސާބުތަކުން ބަޑީގެ އަޑުތައް އިވެމުންދާ ކަމަށް މީޑިއާތަކުން ދަނީ ރިޕޯޓު ކުރަމުންނެވެ. އަދި މިއީ ފާއިތުވި 10 ވަރަކަށް އަހަރު ދުވަހުގެ ތެރޭގައިވެސް ވެރިރަށް ބޭރޫތުގައި ހިގާފައިވާ އެންމެ ބޮޑު ހަމަ ނުޖެހުމެވެ.
މިއަދު ވެރިރަށް ބޭރޫތުގައި، ހިޒުބުﷲ ޖަމާއަތުގެ އިތުރުން އެޖަމާއަތުން ތާއީދުކުރާ ޝިޢައީންގެ ޖަމާއަތެއް ކަމުގައިވާ އަމާލްއިން އިސްވެ، އެތައްހާސް މީހުންނެއް ދިޔައީ، އެގައުމުގެ ޖަސްޓިސް ޕެލަސްއާއި ދިމާލަށް މުޒާހިރާ ކުރަމުންނެވެ. އަދި މި މުޒާހިރާގެ ވަކި ހިސާބަކުން ކޮން ބަޔަކުކަން ނޭގޭ ބަޔަކު، މުޒާހިރާގެ ތެރެއަށް ސްނައިޕަރުން ހަމަލާ ދީފައިވަނީ ބައެއް އިމާރާތްތަކުގެ މަތީގައި ތިބެގެންނެވެ. އަދި ހަމަލާތައް ދޭން ފެށުމާއެކު، މުޒާހިރާ ކުރަމުންދިޔަ ފަރާތްތަކުންވަނީ، ރައްކާތެރިކަން ހޯދުމަށް އެކި ދިމަދިމާލަށް ގޮސް މުޒާހިރާވެސް ރޫޅާލާފައެވެ.
އިރާނުން ތާއީދުކުރާ، ސިޔާސީ އަދި ހަގުރާމަވެރި ޖަމާއަތެއް ކަމުގައިވާ، ހިޒުބުﷲ ޖަމާއަތުން ވެރިރަށް ބޭރޫތުގައި މުޒާހިރާ ކުރުމަށް ގޮވާލާފައިވަނީ، ފާއިތުވެދިޔަ އަހަރު އެގައުމުގެ ޕޯޓު ސަރަހައްދުގައި ހިގައިދިޔަ ކެމިކަލްތައް ގޮވުމުގެ ހާދިސާ ތަހުގީގު ކުރަމުންދާ ފަނޑިޔާރު ތާރީޚް ބިޓާރު މަގާމުން ދުުރުކުރުމަށް ގޮވާލުމުގެ ގޮތުންނެވެ. ފާއިތުވެދިޔަ އަހަރު ހިގައިގެންދިޔަ ބާރުގަދަ މި ގޮވުމުގެ ހާދިސާގައި 200 އަށްވުރެ ގިނަ މީހުންވަނީ މަރުވެފައެވެ.
މިމައްސަލަ ތަހުގީގް ކުރަމުންދާ ފަނޑިޔާރުވަނީ، އިސް ބައެއް އޮފިޝަލުން ހައްޔަރު ކުރުމުގެ އަމުރު ނެރެފައެވެ. މީގެތެރޭގައި، ހިޒުބުﷲ ޖަމާއަތާއި ގުޅުން އޮންނަ އަމާލް ހަރާކާތުގެ އިސް ބައެއް އޮފިޝަލުންވެސް ހިމެނެއެވެ.
ހިޒްބުﷲ ޖަމާއަތުން ބުނެފައިވަނި، ހަމަލާތައް ދީފައިވަނީ ސްނައިޕަރ ބަޑި ބޭނުން ކޮށްގެން ބައެއް އިމާރާތްތަކުގެ މަތީގައި ތިބެގެން ކަމުގައެވެ. އަދި އެއަށްފަހު ވެރިރަށް ބޭރޫތުގެ ތެރެއިން ބަޑީގެ އަޑުތައް އެތައް ގަޑިއިރެއްވަންދެން އިވިގެން ގޮސްފައިވާކަމަށް ލޯކަލް މީޑިއާތަކުން ރިޕޯޓު ކޮށްފައި ވެއެވެ.
އަދި އެމްބިއުލާންސްތަކުގައި، މި ބަޑީގެ ހަމަލާތަކުގައި އަނިޔާ ވެފައިވާ މީހުން ހޮސްޕިޓަލްތަކަށް ގެންގޮސްފައިވާއިރު، އެމްބިއުލާންސްތަކާއި ސައިރެންގެ އަޑުވެސް ސިޓީ އެކިހިސާބުތަކުން އިވެމުން ގޮސްފައި ވެއެވެ. އަދި ބައެއް ހިސާބުތަކަށް ރޮކެޓް ހަމަލާތައްވެސް ވަނީ އަމާޒުވެގެން ގޮސްފައެވެ.
