ކަންދިމާވާގޮތުން، ރައީސުލްޖުމްހޫރިއްޔާއާ ވާހަކަ ނުދެއްވިކަމަވެސް، އިބުރާހިމް މުހައްމަދު ސާލިހާ ވާހަކަ ދައްކަވާނޭކަމުގައި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅު ވެއްޖެއެވެ.

މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ސިޔާސީ ގޮތުން ރައީސް ޞާލިހާއިއެކު މަސައްކަތް ކުރުމަށް ބޭނުން ނުވާކަމަށް ވިދާޅުވި ވިދާޅުވުމާއި ގުޅިގެން ރައީސް ނަޝީދު ވިދާޅުވީ އެމަނިކުފާނާއި ރައީސުލްޖުމްހޫރިއްޔާއާއި އޮތް ގުޅުން ހީނަރުވި ނަމަވެސް އިބްރާހިމް މުހައްމަދު ޞާލިހާއި އޮތް ގުޅުން ހީނަރު ނުވާނެކަމަށެވެ. އަދި ދުވަހަކުވެސް ރައީސުލްޖުުމްހޫރިއްޔާއާއިވެސް އަދި އަދި އިބްރާހިމް މުހައްމަދު ޞާލިހާއިވެސް ވާހަކަ ނުދައްކައި ހުންނެވުމަކީ އެމަނިކުފާނު ހިތައްވެސް އެރިކަމެއް ނޫންކަމަށެވެ. އަދި އެދިވަޑައިގަންނަވަނީ ރައީސުލޖުމްހޫރިއްޔާއާވެސް ވާހަކަ ދެއްކެވުމަށްވެސް މި ނޫސްވެރިންގެ ބައްދަލުވުމުގައި ނަޝީދު ވިދާޅުވިއެވެ.

އަޅުގަޑަށް ދެންނެވޭނީ އަޅުގަޑު ރައީސުލްޖުމްހޫރިއްޔާއާއި ވާހަކަ ނުދައްކާނޭކަމަށް ދެކިގެނެއް ނުހުންނަން، އަދި ހުންނަން އެއީ ދަތިވެސް ކަމެއް.. ރައީސުލްޖުމްހޫރިއްޔާއާއި ވާހަކަ ނުދެއްކިނަމަވެސް، އިބުރާހިމް މުހައްމަދު ސާލިހާ ވާހަކަ ނުދައްކާ އެއީ އަޅުގަޑު ދުވަހަކުވެސް ހިތުއަޅައިގެން ހުރި ކަމެއް ނޫން. އަދި ރައީސުލްޖުމްހޫރިއްޔާއާއި ވާހަކަ ނުދައްކާ ނުދައްކާ ހުރުމަށްވެސް ހިތުއަޅައިގެން ނުހުންނަން.

– ނަޝީދު ވިދާޅުވިއެވެ.

ނަޝީދު ވިދާޅުވީ، މީގެ ކުރިން ފާހަގަ ކޮށްފައިވާ ކަމަކީ، ރައްޔިތުންގެ މަޖިލިހަށް ހުށަހެޅޭ ބިލްތަކަކީ، އެމްޑިޕީގެ ސިޔާސަތުތަކާ އެއްގޮތަށް ޑްރާފްޓު ކުރެވޭ ބިލްތަކަކަށް ވުމުގެ މުހިންމުކަން ބޮޑުކަމުގެ ވާހަކަ ކަމަށާއި، އަަދި ރައީސުލްޖުމްހޫރިއްޔާއާއި ފުންކޮށް ދައްކާން އޮތް ވާހަކައަކީވެސް އެއީކަމުގައެވެ.

މި ނޫސްވެރިންގެ ބައްދަލުވުމުގައި ނަޝީދު ވިދާޅުވީ ރާއްޖެ އަށް ބަރުލަމާނީ ނިޒާމެއް ގެނައުމަށް މަސައްކަތްޕުޅު ކުރައްވަނީ ރައީސް އިބްރާހިމް މުހައްމަދު ސޯލިހްއާ މަޝްވަރާ ކުރައްވައިގެން ކަމަށެވެ. އަދި މިއީ އެކަން ކުރަން އެންމެ ރަނގަޅު ވަގުތުކަމަށް ރައީސް ނަޝީދު ވިދާޅުވިއެވެ. އެމަނިކުފާނު ވިދާޅުވީ ރާއްޖެއަށް ހެޔޮގޮތްތައް ވާނީ ރަނގަޅު ބަރުލަމާނީ ނިޒާމެއް އޮވެގެން ކަމަށެވެ. އެކަން ކުރެވޭނީ ރައީސް ޞާލިހާއި ވާހަކަ ދައްކައިގެން ކަމަށްވުމުން އެކަން ވަރަށް އަވަހަށް ހާމަ ކުރައްވާނެކަމަށެވެ.

ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް އެމްޑީޕީގެ އާންމު މެންބަރުންތަކެއް ދަނީ ކުރަމުންނެވެ. މި ޕެޓިޝަން ރައީސުލްޖުމްހޫރިއްޔާގެ އިތުރުން ރައްޔިތުންގެ މަޖިލީހަށްވެސް ހުށައަޅާނެ ކަމަށް މިކަން އިންތިޒާމު ކުރާ ފަރާތުން ބުނެއެވެ.

ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.

ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.