އިސްރާއީލުގެ އުތުރުގައި ހުންނަ، ސަލާމަތީ ފިޔަވަޅުތައް ވަރުގަދަ ގިލްބޯއާ ޖަލުން ފިލި، ފަލަސްތީނުގެ 6 މުޖާހިދުންގެ މައްޗަށް ރަސްމީކޮށް ދައުވާ ކޮށްފިކަމަށް އިސްރާއީލުގެ ޖަސްޓިސް މިނިސްޓްރީން އާދީއްތަ ދުވަހު ބުނެފިއެވެ.
މި 6 މުޖާހިދުންގެ މައްޗަށް ސަލާމަތީ ފިޔަވަޅުތައް ވަރުގަދަ ޖަލުން ފިލުމުގެ ކުށުގައި ދައުވާ ކޮށްފައިވާއިރު، މި މީހުންނަށް އެހީތެރިވެދިނުމުގެ ތުހުމަތުގައި އިތުރު 5 މީހެއްގެ މައްޗަށްވެސް ދައުވާ ކޮށްފައިވާ ކަމަށް އިސްރާއީލުގެ ޖަސްޓިސް މިނިސްޓްރީން ހާމަ ކޮށްފައި ވެއެވެ.
އިސްރާއީލުގެ ޖަލުން ފާއިތުވެދިޔަ ސެޕްޓެމްބަރު މަހު ފިލި 6 މުޖާހިދުންގެ ތެރެއިން 5 މުޖާހިދަކު ނިސްބަތްވަނީ ފަލަސްތީނުގެ ހަގުރާމަވެރި ޖަމާއަތަކަށެވެ. އަދި 6 ވަނަ މުޖާހިދު ނިސްބަތްވަނީ ފަލަސްތީނު އޮތޯރިޓީގެ ފަތަޙަ ފެކްޝަންގެ ހަތިރާރު އެޅި ގޮތްޕަކަށެވެ.
މި 6 މީހުންވެސް ޖަލަށް ލެވިފައިވަނީ އިސްރާއީލާ ދެކޮޅަށް ހަމަލާތައް ދިނުމުގެ ކުށުގައެވެ.
އިސްރާއީލުގައި ހުރި ސަލާމަތީ ފިޔަވަޅުތައް އެންމެ ވަރުގަދަ އެއް ޖަލުން މުޖާހިދުން ފިލާފައިވަނީ ރޭގަޑުގެ ވަގުތެއްގައި ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ. އިސްރާއީލުގެ އަސްކަރިއްޔާގެ ރޭޑިއޯއިން ބުނެފައިވާ ގޮތުގައި، މުޖާހިދުން ފިލާފައިވަނީ ޖަލުންގެ އެތެއިން ކޮނެގެން ހަދާފައިވާ ޓަނަލެއް ބޭނުން ކޮށްގެންނެވެ. އަދި ބުނެފައިވަނީ، މި މުޖާހިދުން ފިލާފައިވަނީ، ބޭރުގެ ފަރާތްތަކުގެ އެހީތެރިކަން ލިބިގެންކަމީ ކަށަވަރުވެ ޔަގީންވާ ކަމެއްކަމުގައެވެ.
ސަލާމަތީ ފިޔަވަޅުތައް ވަރުގަދަ ގިލްބޯ ޖަލުން މުޖާހިދުން ފިލާފައިވަނީ، އެމީހުން ހައްޔަރު ކޮށްފައިތިބި ސެލްގައިހުރި ސިންކެއްގެ އަޑީގައި ހުރި ޓަނެލްއެގެ ތެރެއިން ލާފައެވެ.
އިސްރާއީލު ސިފައިން އަލުން ހައްޔަރު ކޮށްފައިވާ މަހުމޫދު އަބުދުﷲ އަރުދާހުގެ ގާނޫނީ ވަކީލު ބުނެފައިވާ ގޮތުގައި، މަހުމޫދު އޭނާގެ ގޮޅިން ޓަނެލް ކޮނުމަށް ބޭނުންކޮށްފައިވަނީ، ކާން ގެންގުޅުން ސަމަސަލާއި، ތައްޓާއި، އަދި ސައި ކައްކަން ގެންގުޅުނު ކުރާގެ އަތްގަޑު ފަދަ ތަކެއްޗެވެ.
އަދި މަހުމޫދުއާއި ހަވާލާދީ، އޭނާގެ ގާނޫނީ ވަކީލު ރުސްލާން މަހާޖަނެހު މައުލޫމާތު ދީފައިވާ ގޮތުގައި، އޭނާ ޓަނެލް ކޮނުމުގެ މަސައްކަތް ފަށާފައިވަނީ، ފާއިތުވެދިޔަ އަހަރުގެ ޑިސެމްބަރު މަހުއެވެ.
