ޔުއެފާ ޗެމްޕިއަންސް ލީގުގެ ގްރޫޕް އީގައި ޑީނަމޯ ކިއޭވް އަތުން ފަސޭހަކަމާއެކު ބަޔާން މިއުނިކް މޮޅުވެ، ގްރޫޕްގެ އެއްވަނައިގައި ހަމަ ޖެހިލައިފިއެވެ.
އަމިއްލަ ދަނޑުގައި ކުޅެ ޑީނަމޯ ކިއޭވް އަތުން ބަޔާން މޮޅުވީ 5-0 ގެ ތަފާތު ބޮޑު ނަތީޖާއަކުންނެވެ.
މި މެޗުގެ ފުރަތަމަ ހާފުގައި ރޮބަޓް ލެވަންޑޯސްކީ ވަނީ ދެ ލަނޑު ޖަހައި ބަޔާނަށް ރަނގަޅު ލީޑެއް ނަގައިދީފައެވެ. އަދި މެޗުގެ 68 ވަނަ މިނެޓުގައި ސާޖް ގްނަބްރީ ބަޔާނުގެ ތިންވަނަ ލަނޑު ޖަހައިދިންއިރު، އޭގެ ހަ މިނެޓު ފަހުން ބަޔާނުގެ ފަސްވަނަ ލަނޑު ކާމިޔާބުކޮށްދިނީ ލެރޯއި ސާނޭއެވެ. ދެން މި މެޗުގައި ބަޔާނުން ކާމިޔާބުކުރި ފަސްވަނަ ލަނޑު މެޗު ނިމެން ތިން މިނެޓަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެރިކް މެކްސިމް ޗޮޕޫ-މޯޓިންއެވެ.
މި ނަތީޖާތަކާއެކު ގްރޫޕް އީގެ އެއްވަނައިގައި ބަޔާން އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. ދެވަނައިގައި އޮތް ބެންފީކާއަށް ދެ މެޗުން ހަތަރު ޕޮއިންޓް ލިބިފައިވާއިރު، ތިންވަނައިގައި އޮތް ޑީނަމޯ ކިއޭވަށް ވަނީ ދެ މެޗުން އެއް ޕޮއިންޓް ލިބިފައެވެ. އަދި ފުލުގައި އޮތް ބާސާއަށް ކުޅުނު ދެ މެޗުންވެސް ޕޮއިންޓެއް ލިބިފައެއް ނުވެއެވެ.
