އެލަޔަންސް އޮފް ސްމޯލް އައިލެންޑް ސްޓޭޓްސް (އެއޯސިސް)އަށް ތައުރީފްކޮށް ރައީސް އިބްރާހިމް މުހައްމަދު ޞާލިހު ދެއްކެވި ވާހަކަތަކަށް އެމްޑީޕީގެ ރައީސް މުހައްމަދު ނަޝީދު ރައްދު ދެއްވައިފިއެވެ.
ރައީސް ނަޝީދު ރައްދު ދެއްވާފައިވަނީ އެމަނިކުފާނުގެ އެލެކްސް އެކައުންޓުންނެވެ. ކުދި ޖަޒީރާ ގައުމުތަކުގެ އިއްތިހާދު (އެއޯސިސް)ގެ ގުޅިފައިވާ ތަސައްވުރުގެ ސަބަބުން އެ އިއްތިހާދަކީ ދުނިޔޭގައި ބަސްވިކޭ، ބަދަލެއް ގެނެވޭ ފަދަ ބާރަކަށް ވެއްޖެ ކަމަށް ރައީސް ޞާލިހު ވަނީ ވިދާޅުވެފައެވެ.
ރައީސްގެ ވާހަކަ ތަކާއި ގުޅިގެން ރަައީސް ނަޝީދު ވިދާޅުވީ އެއޯސިސްއަކީ އެއްވެސް ގޮތަކަށް ހިނގާ ތަނެއް ނޫންކަމަށެވެ. އެތަނުން ކުރާ މަސައްކަތެއް، އަމާޒެއްވެސް ނެތްކަމަށް ރައީސް ނަޝީދު ވިދާޅުވިއެވެ. އެމަނިކުފާނު ވިދާޅުވީ ނޮވެމްބަރު މަހު އޮންނަ ކޮޕް 26 ދާއިރުވެސް އެއްވެސް ކަމެއް ނެތްކަމަށެވެ. އަދި މިކަމުގައި ދިވެހި ސަރުކާރުންވެސް ކުރާ އެއްވެސް ކަމެއް ނުފެންނަ ކަމަށް ރައީސް ނަޝީދު ވިދާޅުވިއެވެ.
އެއޯސިސް އެއް ގޮތަކަށްވެސް ނުހިނގާ. އެއްވެސް މަސައްކަތެއް ނުކުރޭ. ޕްލޭނެއް ރޭވުމެއް ނެތް. އަމާޒު ގެއްލިފަ. ރާއްޖެ އަކުންވެސް ތިމަކާއި ނޫޅޭ. ކޮޕް 26 އަށް ދާއިރުވެސް ކަމެއް ނެތް.
– ރައީސް ނަޝީދު އެލެކްސް އެކައުންޓުން ކުރެއްވި ޓުވީޓުގައ ވިދާޅުވިއެވެ.
ރައީސުލްޖުމްހޫރިއްޔާ ވަނީ ކަނޑުތައް ތަޣައްޔަރުވުމާ ބެހޭގޮތުންނާއި ކޮޕް-26 ގެ ކޮންފަރެންސަށް ތައްޔާރު ވުމަށް ކުދި ޖަޒީރާ ޤައުމުތަކަށް ކުރެވިދާނެ ކަންކަމާބެހޭގޮތުން ވާހަކަފުޅު ދައްކަވާފައެވެ. އަދި މި ސަމިޓުން ލީޑަރުން އެއްބަސްވެފައިވާ "ލީޑަރސް ޑެކްލެރޭޝަން"ގެ ސަބަބުން، މިފަދަ މައްސަލަތަކަށް ޚާއްޞަ އަހަންމިއްޔަތެއް ދޭންޖެހިފައިވާކަން ހާމަވާ ކަމަށާއި، އެކަންކަން ހައްލު ކުރުމަށްޓަކައި ތަރައްޤީވެފައިވާ ޤައުމުތަކާއި، ބައިނަލްއަޤްވާމީ ފައިނޭންޝިއަލް އިންސްޓިޓިއުޓްތަކާއި، ޕްރައިވެޓް ސެކްޓަރއާއި، އަދި މަދަނީ ޖަމުޢިއްޔާ ޖަމާޢަތްތަކުގެ އެއްބާރުލުން ނުހަނު ބޭނުންވެފައިވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އަދ، މި މަސައްކަތުގައި އެދެވޭ ކުރިއެރުން ލިބޭނެ ގޮތަށް ރޭވުންތެރިކަމާއެކު މަސައްކަތްކުރުމަށް ބައިނަލްއަޤްވާމީ މުޖުތަމަޢަށް ރައީސުލްޖުމްހޫރިއްޔާ ގޮވައިލެއްވިއެވެ.
ކުދި ޖަޒީރާ ޤައުމުތަކުގެ ފުރަތަމަ ކޮންފަރެންސް 1989 ވަނަ އަހަރު ރާއްޖޭގައި ބޭއްވުމަށް ފަހު، ރާއްޖެ އިން ވަނީ ކުދި ޖަޒީރާ ގަމުތައް އެކުލެވޭ ޖަމާއަތެއް އުފެއްދުމުގެ މަސައްކަތް ބާރަށް ކުރިއަށް ގެންގޮސްފަ އެވެ.
އެގޮތުން އައްސޭރިފަށުގެ ބިންތިރި، ކުދި ގައުމުތައް ތަމްސީލުކުރާ ޖަމާޢަތް ކަމުގައިވާ 'އެއޯސިސް' އުފެދުނީ 1990 ގައި ޖެނީވާގައި ބޭއްވި ދުނިޔޭގެ ދެވަނަ ކްލައިމެޓް ކޮންފަރެންސްގެ ތެރެއިންނެވެ. އެއޯސިސް އަކީ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އާއި ބައިނަލްއަގްވާމީ އެންވަޔަރަންމަންޓް ޕޮލިސީ އަށް ވަކާލާތުކޮށް އަދި ދުނިޔޭގެ މޫސުމަށް އަންނަ ބަދަލުތަކުގެ މައްސަލަ އަށް ހާއްޞަ ސަމާލުކަމެއްދޭ ޖަމާއަތެކެވެ.
