އެމްޑީޕީގެ މިހާރުގެ ރައީސް މުހައްމަދު ނަޝީދާއި ނުލައި އުޅުމަށް އެމްޑީޕީގެ ބައެއް ބޭފުޅުން މަސައްކަތް ކުރާ ކަމަށާއި، ނަމަވެސް ރައީސް ނަޝީދާއި ނުލައި އެމްޑީޕީ ނޯންނާނެކަމަށް އެޕާޓީގެ ޤައުމީ މަޖިލިސް މެމްބަރު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.

އެމްޑީޕީގެ ދާއިރާތަކުގެ އިންތިޚާބުގައި މާލެ ސިޓީގެ ރައީސްކަމަށް ކުރިމަތިލައްވާ ސިފާގެ ކެމެޕްއިން ޖަލްސާގައި ރޭ އެމްޑީޕީގެ ހަރުގޭގައި ވާހަކަ ދައްކަވަމުން އިންތި ވިދާޅުވީ ސަރުކާރުގެ ބައެއް މަޤާމުތަކުގައާއި، އެމްޑީޕީގެ ބައެއް މަޤާމުތަކުގައި ތިއްބެވި ބައެއް ބޭފުޅުންނަށް ރައީސް ނަޝީދާއި ނުލައި އުޅުމަށް މަަސައްކަތް ކުރަމުންދާކަމަށެވެ. ނަމަވެސް ރައީސް ނަޝީދާއި ނުލައި އުޅުމަށް މަސައްކަތް ކުރާ މީހުންނަކީ ކޮން ނިޔަތެއްގައި މަސައްކަތް ކުރާ ބައެއްކަން ނޭގޭކަމަށާއި، އަދި އޭރުން އޮންނާނީ އެމްޑީޕީއެއް ނޫންކަމަށްވެސް އިންތި ވިދާޅުވިއެވެ.

ބައެއް ބައެއް ފަރާތްތަކުން، އެމްޑީޕީގެ އެެރޭގައި ސަރުކާރުގެ މަޤާމުތަކުގައި ތިއްބެވި ބައެއް ބޭފުޅުން އެބަ ވިސްނުން ބަހައްޓާ ރައީސް ނަޝީދާއި ނުލައި އުޅުމަށް. އެހެން ކަމަށް ވަނީނަމަ އަޅުގަނޑު ނެކޭ ގޮތުގައި ދެން އޮންނާނީކީ އެމްޑީޕީއެއް ނޫން. އެމްޑީޕީއަކީ ފަލްސަފާއެއް. ގަބޫލުކޮށްގެންތިބޭ ވަރަށް ވަރުގަދަ އަސާސްތަކެއްގެ މައްޗަށް ބިނާވެގެންވާ ޕާޓީއެއް.

– އިންތި ވިދާޅުވިއެވެ.

އިންތި ވިދާޅުވީ އެމްޑީޕީއަކީ ވަކި ފަލްސަފާތަކާއި، ވަކި ސިޔާސަތުތަކެއް ޤަބޫލުކުރާ ޕާޓީއެއް ކަމަށެވެ. އެކަން ނަގަހައްޓައި މިހާދުވަހު ދެމެހެއްޓެވި ބޭފުޅަކީ ރައީސް ނަޝީދު ކަމަށާއި، އެމަނިކުފާނު އެއްކައިރިކޮށްގެން އެމްޑީޕީގެ ގަބޫލު ކުރާ އަސާސްތައް ނެގެހެއްޓޭނެ ދެވަނަ ލީޑަރު އެމްޑީޕީގައި ނެތްކަމަށެވެ. އަދި އެމްޑީޕީއަށްވެސް ކުރިއަށް އޮތް އިންތިޚާބުގައި ޕާޓީގެ މަސްލަހަތަށްވެސް އޮތް އެންމެ ރަނގަޅު ގޮތަކީ ރައީސް ނަޝީދާއި، ރައީސް ޞާލިހު އެކީގައި މަސައްކަތް ކުރެއްވުންކަމަށް އިންތި ވިދާޅުވިއެވެ.

ވަރަށް ގިނަ ބަޔަކު ގުރުބާންވެގެން، ވަރަށް ގިނަ ބަޔަކު ޖަލަށް ގޮސްގެން ވަރަށް ގިނަ ބަަޔަކު ވަރަށް ގިނަ މަސައްކަތުން މިހާ ހިސާބަށް އަޅުގަނޑުމެންނަށް އާދެވިފައި މިވަނީ. އެހެންވީމާ މި އަސާސްތައް ނަގަހައްޓާ ދެމަހައްޓާ ދެވަނަ ބޭފުޅެއްނެތް ރައީސް މުހައްމަދު ނަޝީދު ފިޔަވައި، އެހެންކަމުން އަޅުގަނޑު ދެކޭ ގޮތުގައި ރައީސް ޞާލިހާއި، ރައީސް ނަޝީދު އެކުގައި މަސައްކަތް ކުރަން އެބަ ޖެހި ވަޑައިގަންނަވާ. މިޕާޓީ އިތުރަށް ވަރުގަދަ ކުރުމަށްޓަކައި.

– އިންތި ވިދާޅުވިއެވެ.

ރައީސް ނަޝީދާއި، ރައީސް ޞާލިހުގެ މެދުގައި ސިޔާސީ ވާދަވެރިކަން ބޮޑުވެފައިވާ މިދަނޑިވަޅުގައި އެމްޑީޕީގެ ޤައުމީ މަޖިލިސް އިންތިޚާބު ބާއްވާއިރު، މިއިންތިޚާބުގައި އެމްޑީޕީ ތެރެއިން ރައީސް ނަޝީދާއި، ރައީސް ޞާލިހަށް ތާއީދު ކުރައްވާ ކެނޑިޑޭޓުންގެ މެދުގައި ވަރަށް ވާދަވެރި ކެމްޕެއިނެއް ދަނީ ކުރަނުންނެވެ.

އެމްޑީޕީގެ މި އިންތިޚާބަށްފަހު ޕާޓީ އިތުރަށް ބައިބައި ވެދާނެކަމަށް ދެކެވޭ ވާހަތަކަށް ރައްދު ދެއްވަމުން އެމްޑީޕީގެ ޗެއާ ޕާސަން ހަސަން ލަތީފް ވިދާޅުވެފައިވަނީ އެމްޑީޕީއަކީ އިންތިޚާބު ތަކުގައި ވާދަވެރި ބައެއް ކަމަށާއި، އިންތިޚާބަށްފަހު ޕާޓީ އަލުން އެކަތި ގަނޑަކަށް ވެގެންދާނެކަމަށެވެ. ނަމަވެސް ބައެއް ފަރާތްތަކުން ބުނަމުންދަނީ އެމްޑީޕީ ތެރޭގައި ޚާއްސަކޮށް ރައީސް ނަޝީދާއި، ރައީސް ޞާލިހުގެ މެދުގައި އޮތް ސިޔާސީ ވާދަވެރި ކަމުގައި ދެބޭފުޅަށް ދެން އެކީގައި މަސައްކަތް ކުރުމަކީ ވަރަށް ދުރު ކަމެއްކަމަށެވެ.