5.7 މިލިއަން މީހުންގެ އާބާދީއެއް އޮންނަ ސިންގަޕޯރގައި އެގައުމުގެ އާބާދީގެ %80 މީހުންނަށް ކޯވިޑް19 ވެކްސިންދީ ފުރިހަމަ ކޮށްގެން، ދުނިޔޭގައި މިވަގުތު އޮތް، އާބާދީގެ އެންމެ ބޮޑު ބަޔަކަށް ކޯވިޑް ވެކްސިން ދީ ފުރިހަމަކޮށްފައި އޮތް ގައުމަކަށް ސިންގަޕޯރ ވެއްޖެއެވެ. އަދި ސިންގަޕޯރއިން މިހާރު ތައްޔާރުވަމުން ދަނީ، ކޯވިޑް ކޮންޓްރޯލު ކުރުމަށް އެގައުމުގައި އަޅާފައިވާ ފިޔަވަޅުތަކަށް އިތުރަށް ލުއި ދިނުމަށެވެ.
"އަހަރެމެން މިވަނީ އިތުރު ލަނޑުދަޑިއެއް ހާސިލް ކޮށްފަ، ގައުމުގެ މުޅި އާބާދީގެ %80 މީހުންނަށް މިހާރުވަނީ ވެކްސިން ޖަހާ ފުރިހަމަ ވެފަ،" ފްރާންސްގެ ބުކް ޕޯސްޓަށް އާދީއްތަ ދުވަހު ދެއްވި ބަސްދީގަތުމެއްގައި ސިންގަޕޯރގެ ހެލްތު މިނިސްޓަރ އޮންގ ޔީ ކުންގ ވިދާޅުވެފައި ވެއެވެ.
"އޭގެ މާނައަކީ، ކޯވިޑް19އިން ރައްކާތެރި ވުމުގެ ގޮތުން އަހަރެމެން މިތިބީ އިތުރު ފިޔަވަޅެއް ކުރިޔަށް އަޅައިގެން."
ސިންގަޕޯރގެ މުޅި އާބާދީގެ %80އަށް ކޯވިޑް19 ވެކްސިން ދީ ފުރިހަމަ ވެފައިވާކަމަށް އެގައުމުގެ އޮފިޝަލުން ހާމަ ކުރެއްވުމާ ގުޅިގެން، ރޮއިޓާސް ނިއުސް އޭޖެންސީން ބަލަހައްޓަމުންދާ ހިސާބުތަކަށް ބަލާއިރު، ނިސްބަތުން ކުޑަ އާބާދީއެއް އޮންނަ މިގައުމު މިހާރު ވެފައިވަނީ އެންމެ އަވަހަށް އާބާދީއަށް ވެކްސިން ދީ ނިންމަމުންދާ ގައުމު ކަމުގައެވެ.
ދުނިޔޭގައި، އާބާދީގެ ނިސްބަތުން އެންމެ މަތީ އަދަދަކަށް ކޯވިޑް19 ވެކްސިން ދީފައިވާ އެހެން ގައުމުތަކުގެ ތެރޭގައި ދެން ހިމެނެނީ، ޔުނައިޓެޑް އަރަބި އެމިރޭޓްސްއާއި، އުރުގުއާއި، ޗިލީއެވެ. މި ގައުމުތަކަކީ، އެގައުމުތަކުގެ އާބާދީގެ %70 އަށް ވެކްސިން ދީ ނިންމާފައިވާ ގައުމުތަކެވެ.
މި އަހަރުގެ ޖެނުއަރީމަހު، އާބާދީއަށް ކޯވިޑް19 ވެކްސިން ދޭން ފެށި ސިންގަޕޯރގައި ދީފައިވަނީ މުޅިންވެސް ފައިޒަރ/ބައޯއެންޓެކް ވެކްސިންއާއި މޮޑާނާ ވެކްސިން އެވެ.
މިހަފްތާގެ ހޮނިހިރު ދުވަހު، ސިންގަޕޯރގައި 113 މީހަކު ކޯވިޑް19އަށް ޕޮޒިޓިވް ވެފައިވެއެވެ. ކޯވިޑް ކާރިސާ ފެށުނުފަހުން ސިންގަޕޯރގައި ކޯވިޑް19އަށް ޕޮޒިޓިވް ވެފައިވަނީ 67,171 މީހުންނެވެ. އަދި މިބަލީގައި މަރުވެފައިވަނީ އެގައުމުގައި އެންމެ 55 މީހުންނެވެ.
ކޮމެންޓު ފޮނުވާ