ގައުމީ ޔުނިވާސިޓީ (އެމްއެންޔޫ) ގެ ދަނާލުގައި ދިރިއުޅެމުންދިޔަ އުމުރުން 18 އަހަރުގެ އަންހެން ކުއްޖަކު ނިޔާވި ހިތާމަވެރި ހާދިސާ، ހިއުމަން ރައިޓްސް ކޮމިޝަން (އެޗްއާރްސީއެމް) އާއި ދިވެހި ފުލުހުންގެ ޚިދުމަތުން ތަހުގީގުކުރަން ފަށައިފިއެވެ.
މާލޭގައި ކިޔަވާ ކުދިން ބައިތިއްބާ އެކޮމޮޑޭޝަނެއްގައި މީގެ ދެ ދުވަސް ކުރިން ހިނގި މި ހާދިސާއާ ގުޅިގެން އެޗްއާރްސީއެމް އިން ބުނީ، ފުލުހުންގެ އިތުރުން އެ ކޮމިޝަނުން އިސްނަގައިގެން ވެސް މި މައްސަލަ މިހާރު ބަލަމުން އަންނަ ކަމަށެވެ.
މި މައްސަލައާ ގުޅުވައިގެން މީސްމީޑިއާގެ އެކި މަންސަތަކުގައި ހަގީގަތާ ހިލާފު ދޮގު ވާހަކަތަކާއި، އެއްވެސް އަސާސެއް ނެތް ތުހުމަތުތަކުގެ އިތުރުން ވީޑިއޯ ފަދަ ތަކެތި ފަތުރަމުންދާކަން ފާހަގަކުރެވިފައިވާ ކަމަށް ފުލުހުން ވަނީ ބުނެފައެވެ. އެހެންކަމުން، އެފަދަ އަމަލުތައް ނުކުރުމަށް އިދާރާތަކުން ވަނީ އަންގާފައެވެ.
ހަމައެހެންމެ، މަރުހޫމާގެ ކަރާމާތަށް އުނިކަން އަންނަ ފަދަ އެއްވެސް މައުލޫމާތެއް ނުވަތަ ޒާތީ ކަމެއް އާންމު ނުކުރުމަށާއި، އާއިލާގެ މި ހިތާމަވެރި ވަގުތުގައި އެފަދަ ކަންކަމުން ދުރުވެތިބުމަށް އެޗްއާރްސީއެމް އިން ވެސް ވަނީ އާންމުންނަށް ވަރަށް ބޮޑަށް އިލްތިމާސްކޮށްފައެވެ.
ކޮމެންޓު ފޮނުވާ