އީރާނުގެ އިގްތިސާދީ ހާލަތު ގޯސްވެ، ސަރުކާރާ ދެކޮޅަށް އެގައުމުގެ ރައްޔިތުން ކުރަމުންދާ ސިލްސިލާ މުޒާހަރާތަކުގައި، އީރާނުގެ ސަރުކާރު ހިމާޔަތް ކުރުމުގެ ބަދަލުގައި އެގައުމުގެ ރައްޔިތުންނާއެކު ތިބުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ. އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ، އީރާނުގެ ރައްޔިތުން މަގުތަކަށް ނުކުމެ ތިބީ ޒަމާންވީ ހިފެހެއްޓުންތަކާއި ދިރިއުޅުމުގެ އަގުބޮޑުވުމުގެ ތަކުލީފުތަކުން މިންޖުވުމަށް ކަމަށެވެ. އެހެންކަމުން މުސްލިމް ގައުމުތަކާއި ބައިނަލްއަގްވާމީ މުޖުތަމައުއިން ޖެހޭނީ އެ ރައްޔިތުންނަށް އެއްބާރުލުން ދޭންކަމަށް ނަޝީދު ފާހަގަކުރެއްވިއެވެ.
އީރާނުގެ ފައިސާގެ އަގު ވެއްޓި، އިންފްލޭޝަން މަތިވުމުގެ ސަބަބުން އާންމު ދިރިއުޅުމަށް ދަތިވެ ފަށާފައިވާ މި މުޒާހަރާތައް މިހާރު ވަނީ އެގައުމުގެ އެކި ސިޓީތަކަށް ފުޅާވެފައެވެ. މުޒާހަރާތައް ކޮންޓްރޯލް ކުރުމަށް ސަރުކާރުން ހަރުކަށި ފިޔަވަޅުތައް އަޅަމުންދާއިރު، ސަލާމަތީ ބާރުތަކާ ދެމެދު ހިނގި ކުރިމަތިލުންތަކުގައި މީހުން މަރުވެފައިވާ ކަމަށް ރިޕޯޓުތައް ބުނެއެވެ. އީރާނު ސަރުކާރުން ވަނީ ގާނޫނާ ހިލާފަށް އެއްވެ އަމަން ނަގާލާ ފަރާތްތަކަށް ހަރުކަށި އަދަބު ދޭނެކަމުގެ އިންޒާރު ދީފައެވެ.
މި ހަމަނުޖެހުންތަކާ ގުޅިގެން އެމެރިކާއިން ވަނީ މުޒާހަރާކުރާ ފަރާތްތަކަށް ހަމަލާދީފިނަމަ އީރާނާ ދެކޮޅަށް ފިޔަވަޅު އަޅާނެކަމަށް ބުނެފައެވެ. އަދި މި މުޒާހަރާތަކަށް އެމެރިކާ އާއި އިޒްރޭލުގެ މަދަދު ލިބޭކަމަށް ބައެއް މީޑިއާ ރިޕޯޓުތަކުގައި ތުހުމަތުކޮށްފައިވާއިރު، އެގައުމުގެ ސަރުކާރަށް ތާއީދުކޮށްވެސް ބަޔަކު އަންނަނީ މަގުތަކަށް ނުކުންނަމުންނެވެ. އިގްތިސާދީ މާހިރުން ދެކޭގޮތުގައި އީރާނުގެ ހާލަތު ގޯސްވީ ދަތިކުރުމުގެ ފިޔަވަޅުތަކާއި އެތެރޭގެ މެނޭޖްމަންޓް ދޯދިޔާވުމުންނެވެ.
ކޮމެންޓު ފޮނުވާ