ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުގެ މާނަ އޮޅުވާލާފައިވާ ކަމަށާއި މީހުން ދިރިއުޅޭ ރަށްރަށުގައި ބަނގުރާ ހުއްދަކުރަން ނުޖެހޭ ކަމަށް އެމަނިކުފާނު މިއަދު ވިދާޅުވެއްޖެއެވެ.
ކ. މާފުށި "ހާޓް އޮފް މޯލްޑިވްސް" ގެ ނަމުން ބްރޭންޑް ކުރުމަށް ބޭއްވި ހަފްލާގައި ވާހަކަދައްކަވަމުން ނަޝީދު ވަނީ ރިސޯޓުތަކުން ޓޫރިސްޓުންނަށް ދޭ ޚިދުމަތްތައް ބޮޑެތި ހޮޓާތަކުން ނުދެވުމަކީ ބޭއިންސާފެއް ކަމަށް ވިދާޅުވެފައެވެ. މީގެ ސަބަބުން ނަޝީދަށް ފާޑުކިޔުން އަމާޒުވުމުން އެމަނިކުފާނު އެކްސްގައި ވިދާޅުވީ ސާފު ދިވެހި ބަހުން ދެއްކި ވާހަކަ ދޮގު މާނަ އަދި ތަރުޖަމާ އީޖާދުކޮށްގެން މީހުންނަށް ގެއްލުންދޭން އުޅުމަކީ ނުރައްކާތެރި ކަމެއް ކަމަށެވެ.
ނަޝީދު ފާހަގަކުރެއްވީ ރިސޯޓުތަކުގައި ލިބޭ އެހެން ރަށްތަކުގައި ނުލިބޭ އެކަނި އެއްޗަކީ ރަލާއި އޫރުމަސް ނޫން ކަމަށާއި މީހުން ދިރިއުޅޭ ރަށްރަށުގައި އެއްޗެއް ހުއްދަކުރާކަށް ނުޖެހޭ ކަމަށެވެ.
މިނިސްޓަރ އޮފް ޓޫރިޒަމް ތޯރިގު އިބްރާހިމް ރައީސް އޮފީހުގެ ނޫސްވެރިންގެ ބައްދަލުވުމުގައި ވިދާޅުވީ މީހުން ދިރިއުޅޭ ރަށްތަކުގައި ރަލާއި އޫރުމަސް ވިއްކުމަކީ ކޮށްގެންވާނެ ކަމެއް ނޫން ކަމަށާއި އެއީ ސަރުކާރުގެ ސިޔާސަތެއް ވެސް ނޫން ކަމަށެވެ. ބައެއް ސަފާރީތަކުން މީހުން ދިރިއުޅޭ ރަށްތަކަށް ބަނގުރާ ބޭލުމަކީ ދޭތެރެއަކުން ޖެހޭ މައްސަލައެއް ކަމަށާއި އެފަދަ ކަންކަމަށް ހައްލު ގެނައުމަށް މަސައްކަތް ކުރަމުންދާ ކަމަށް ތޯރިގު ވިދާޅުވިއެވެ.
ލޯކަލް ރަށްރަށަކީ ޑްރައި ޓޫރިޒަމެއް ކަމަށާއި އޫރުމަހާއި ރަލް ހުރެގެން ނުވާނެ ކަމަށް ތޯރިގު ވިދާޅުވިއެވެ.
ކޮމެންޓު ފޮނުވާ