ގައުމުގައި ހަމަޖެހުން ގާއިމްކުރުމަށް ރައްޔިތުން ދެއްވާ ތާއީދަކީ ސަރުކާރަށް ލިބޭ އެންމެ ބޮޑު އެހީތެރިކަން ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. މިކަން ރައީސް ފާހަގަކުރެއްވީ ތ. އަތޮޅަށް ކުރައްވާ ދަތުރުފުޅުގައި ރޭ ވިލުފުށީ ރައްޔިތުންނާ ބައްދަލުކުރެއްވުމުގައެވެ.
ވިލުފުށީ ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގައި ހަމަޖެހުން ގާއިމްކުރުމަށް ރައްޔިތުން ދެއްވާ އެއްބާރުލުމަކީ ފެންނަން ނެތް ނަމަވެސް އިހުސާސްކުރެވޭ ކަމެއް ކަމަށެވެ. ސަރުކާރުން ވިލުފުއްޓަށް ކޮށްދޭން ހަމަޖެހިފައިވާ ތަރައްގީގެ މަޝްރޫޢުތަކުގެ ދިގު ލިސްޓެއް އިއްވަވައި، އެ ކަންކަމުގެ ފައިދާ ލިބޭނީ ރައްޔިތުންގެ އެއްބާރުލުމާއެކު ގައުމުގައި ހަމަޖެހުން ގާއިމްވެގެން ކަމަށް ރައީސް ވިދާޅުވިއެވެ.
ދަރިންނަށް އުފާފާގަތި މުސްތަގުބަލެއް ބިނާކުރުމަކީ ސަރުކާރުގެ މައިގަނޑު އަމާޒު ކަމަށް ރައީސް ވިދާޅުވިއެވެ. އަދި މިކަން ހާސިލުވަމުންދަނީ އެންމެން އެކުގައި ގައުމު ހެޔޮ މަގުން ގެންދިއުމަށް މަސައްކަތްކުރާތީ ކަމަށް ވެސް ފާހަގަކުރެއްވިއެވެ. "އަޅުގަނޑުމެން ބޭނުމެއް ނޫން ކުރީގައި މާޒީން ފެނުނު ދުވަސްތަކެއް އަނބުރާ ގެންނާކަށެއް. އެއީ ބަދަލުހިފުމުގެ ރޫހާއި ގައުމުގެ ކަންކަން ހަލާކުކޮށްލާ ގޯސް މާޒީއެއް،" ރައީސް ވިދާޅުވިއެވެ.
ކުރިއަށް ބަލައިގެން، އެންމެން އެކުގައި ގައުމުގެ ކަންކަން މައުނަވީ ގޮތުގައާއި ހުރިހާ ދާއިރާއެއްގައި ރަނގަޅުކޮށް ތަރައްގީކުރުމަށް ކުރާ މަސައްކަތުގައި ރައްޔިތުން ދެއްވާ އެއްބާރުލުމަކީ އެންމެ ބޮޑު އެހީތެރިކަމެއްގެ ގޮތުގައި ގަބޫލުކުރައްވާ ކަމަށް ރައީސް ވިދާޅުވިއެވެ. ރާއްޖޭގެ ހުރިހާ ރައްޔިތުންނަށް ހަމަހަމަކަމާއެކު ޚިދުމަތްތައް ފޯރުކޮށްދިނުމަކީ ސަރުކާރުގެ ސިޔާސަތެއް ކަމަށް ވެސް ރައީސް ފާހަގަކުރެއްވިއެވެ.
ސަރުކާރުން ގައުމާ ހަވާލުވީ އިގްތިސާދީ ގޮތުން ބޮޑެތި ގޮންޖެހުންތަކާ ކުރިމަތިލާންޖެހިފައިވާ ދުވަސްވަރެއްގައި ކަމަށް ވިޔަސް، ފައިސާ ޗާޕުނުކޮށް، ލޯނުތައް ދައްކަމުން، ހުރިހާ ޚިދުމަތެއް ވެސް ރައްޔިތުންނަށް ލިބޭކަން ކަށަވަރުކޮށްގެން ކުރިއަށްދާ ކަމަށް ރައީސް ވިދާޅުވިއެވެ. ސަރުކާރުން ކަނޑައަޅާފައިވާ ތާވަލަށް އެއްވެސް ބަދަލެއް ނުގެނެސް، ރައްޔިތުންނަށް ދޭންޖެހޭ ޚިދުމަތްތައް ދެމުން ގެންދާނެ ކަމުގެ ޔަގީންކަން ވެސް ރައީސް ދެއްވިއެވެ.
ރައީސް މުއިއްޒު ތ. އަތޮޅަށް ކުރައްވާ ދަތުރުފުޅަކީ އެ އަތޮޅުގެ ރައްޔިތުންނާ ބައްދަލުކުރައްވައި، އެ ސަރަހައްދުގެ ތަރައްގީގެ މަޝްރޫޢުތައް ބައްލަވާލެއްވުމަށް ކުރައްވާ ދަތުރުފުޅެކެވެ.
ކޮމެންޓު ފޮނުވާ