އެތުލެޓިކް ބިލްބާއޯ ބަލިކޮށް ބާސާ ލީގުގެ ތިން ވަނައަށް

އެތުލެޓިކް ބިލްބާއޯ 3-2 އިން ބަލިކޮށް ބާސެލޯނާ އިން ސްޕެނިޝް ލީގުގެ ތިން ވަނަ އަށް އަރައިފިއެވެ.

ލިއޮނަލް މެސީގެ ދެ ލަނޑާއެކު ބާސާ މޮޅުވިއިރު ރޭގެ މެޗުގެ ތިން ވަނަ މިނެޓުގައި ވިލިއަމްގެ ގޯލުން އެތުލެޓިކް ކްލަބުން ލީޑު ނެގި އެވެ. ބާސެލޯނާ އަށް 14 ވަނަ މިނެޓުގައި އެއްވަރުކޮށްދިނީ ޕެޑްރީ އެވެ. ބާސެލޯނާ އަށް ލީޑު ނަގައިދީ އަދި ފުޅާކޮށްދިނީ 38 ވަނަ މިނެޓާއި 62 ވަނަ މިނެޓުގައި މެސީ އެވެ. އެތުލެޓިކް ކްލަބުން 90 ވަނަ މިނެޓުގައި މުނިއަން ޖެހި ގޯލުން ބާސެލޯނާ ހާސްކޮށްލި ނަމަވެސް ނަތީޖާ އަށް ބަދަލެއް ނުގެނެވުނެވެ.

ބާސެލޯނާ ތިން ވަނައިގައި އޮތީ 17 މެޗުން 31 ޕޮއިންޓް ހޯދައިގެންނެވެ. ތާވަލުގެ ދެ ވަނައިގައި އޮތް ރެއާލް މެޑްރިޑަށް 17 މެޗުން ވަނީ 36 ޕޮއިންޓް ލިބިފަ އެވެ. ތާވަލުގެ އެއް ވަނައިގައި އޮތް އެތުލެޓިކޯ މެޑްރިޑް 15 މެޗުން 38 ޕޮއިންޓް ހޯދާފައިވާއިރު އެ ޓީމުގެ އަތުގައި ދެން އޮތް ދެ މެޗުން މޮޅުވެގެން ފަރަގު ބޮޑުކޮށްލެވޭނެ އެވެ.