ސިންގަޕޫރާއެކު ދިވެހިރާއްޖެއިން އޮންނަ ގުޅުން އިތުރަށް ބަދަހިކޮށް، އެއްބާރުލުމުގެ އާ ފުރުސަތުތައް ހޯދުމަށް މަސައްކަތްކުރަމުންދާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ސިންގަޕޫރުގެ ގައުމީ ދުވަހުގެ މުނާސަބަތުގައި އެގައުމުގެ ރައީސް ތާމަން ޝަންމުގަރަތްނަމް އަދި ބޮޑުވަޒީރު ލޯރެންސް ވޯންގަށް ތަހުނިޔާގެ މެސެޖެއް ފޮނުއްވަމުން ރައީސް މުއިއްޒު މިކަން ފާހަގަކުރެއްވިއެވެ. ސިންގަޕޫރަކީ މިއަދު ވެސް އެގައުމުގެ މަތިވެރިކަން ރައްކާތެރިކޮށް، އަމާންކަމާއި ފާގަތިކަން ލިބިފައިވާ ގައުމެއްގެ ގޮތުގައި ކުރިއަށްދާން އެދިވަޑައިގަންނަވާކަމަށް ވެސް ރައީސް މުއިއްޒު އެ މެސެޖުގައި ވިދާޅުވިއެވެ.
ދެ ގައުމުގެ ދެމެދުގައި އޮންނަ ގުޅުމަކީ އިތުބާރާއި އެކުވެރިކަމުގެ މައްޗަށް ބިނާވެފައިވާ، ދެ ގައުމަށް ވެސް ފައިދާހުރި ގުޅުމެއް ކަމަށާއި، މި ގުޅުން ވަނީ ފުޅާވެފައި ކަމަށް ރައީސް މުއިއްޒު ފާހަގަކުރެއްވިއެވެ. އަދި ދިވެހިރާއްޖެއިން ބޭނުންވަނީ ސިންގަޕޫރާއެކު އޮންނަ މި ގުޅުން އިތުރަށް ވަރުގަދަކޮށް، އެއްބާރުލުމުގެ އިތުރު ދޮރުތައް ހުޅުވުމަށް ކަމަށް ވެސް ރައީސް މުއިއްޒު ވިދާޅުވިއެވެ.
ދިވެހިރާއްޖެއާއި ސިންގަޕޫރާ ދެމެދު ޑިޕްލޮމެޓިކް ގުޅުން ގާއިމުކުރީ 1975 ވަނަ އަހަރުގައެވެ. އެދުވަހުން ފެށިގެން މިއަދާ ހަމައަށް ދެ ގައުމުގެ ގުޅުން އެކި ދާއިރާތަކުން ދަނީ ވަރުގަދަވަމުންނެވެ. ވިޔަފާރި، ތަޢުލީމު، ސިއްހަތު އަދި ޓޫރިޒަމް ފަދަ މުހިންމު ދާއިރާތަކުން ދެ ގައުމު ދަނީ ގާތް ގުޅުމެއްގައި މަސައްކަތްކުރަމުންނެވެ.
ކޮމެންޓު ފޮނުވާ