މާޒިޔާގައި މި އޮތް ސްކޮޑާއި ކުޅުންތެރިންގެ މެދުގައި މި އޮތް އިތުބާރާ އެކު އެ ޓީމު އިތުރަށް ވަރުގަދަ ކުރެވޭނެކަމަށް އެ ޓީމާ ހަވާލުވި ކޯޗު ސާބިއާގެ ރިސްޓޯ ވިޑަކޮވިޗް ބުނެފި އެވެ.
މާޒިޔާއާ އެކު އެއްބަސްވުމުގައި ސޮއިކުރުމަށް ފަހު ބޭއްވި ނޫސްވެރިންގެ ބައްދަލުވުމުގައި ވިޑަކޮވިޗް ބުނީ އާންމު އުސޫލުންނަމަ ޓީމަކާ ހަވާލުވާން ކޮންމެ ކޯޗަކަށް ވެސް އެންމެ ބޭނުންވާނީ ރަނގަޅު ޕްރީ ސީޒަނެއް ވެސް ފުރިހަމަކުރަން ވަގުތު އޮންނަ ގޮތަށް ކަމަށެވެ. ސީޒަނެއްގެ މެދުތެރެއިން ޓީމަކާ ހަވާލުވުމަކީ އެންމެ ރަނގަޅު ގޮތް ކަމަށް ނުވެދާނެ ކަމަށެވެ. މި ފުރުސަތުގެ ބޭނުން ހިފަން ބޭނުންވި އެންމެ ބޮޑު ސަބަބަކީ އަމިއްލަ ކެރިއަރުގައި ވެސް ކުރިއަށްދިއުމުގެ ވިސްނުމާއި މާޒިޔާގައި އޮތް ޓީމާ އެކު ކަންތައްތަކެއް ހާސިލްކުރެވޭނެ ކަމުގެ އުއްމީދު ބޮޑުވުމުން ކަމަށް އޭނާ ބުނެފައިވެއެވެ.
މީގައި އަހަންނަށް އެންމެ ކަމުދާ ކަމަކީ މި ޓީމުގެ ތެރޭގައި މި އޮތް މާހައުލު. ވަރުގަދަ އިތުބާރެއް އޮތް ކުޅުންތެރިންތަކެއް ތިބުމަކީ އަހަންނަށް ވެސް ހިތްހަމަޖެހުމެއް.
– ވިޑަކޮވިޗް ބުނެފައިވެ އެވެ.
ވިޑަކޮވިޗް ބުނީ މާޒިޔާ ލައްވައި އޭނާ ކުޅުވަން ބޭނުންވަނީ މި ޓީމަށް އެންމެ ރަނގަޅުވާނެ ސްޓައިލުގެ ފުޓްބޯޅަ ކަމަށެވެ. ބޮޑަށް ވިސްނަނީ ޓެކްނިކަލީ ރަނގަޅު ސްޕެއިން ސްޓައިލުގެ ފުޓްބޯޅަ އެއް ކުޅުވަން ކަމަށް އޭނާ ބުނެފައިވެއެވެ.
މީގައި ވަރަށް މުހިއްމު ކުޅުންތެރިންނާއި ކޯޗުގެ މެދުގައި ވެސް އެ އޮންނަ ޔަގީންކަން ވަރުގަދަވުން.
– މާޒިޔާގެ އާ ކޯޗު ބުނިއެވެ.
މާޒިޔާ އިން މި ފަހަރުގެ އޭއެފްސީ ކަޕްގެ ގްރޫޕް ސްޓޭޖުގައި ވާދަކުރާއިރު، ސެރެސްގައި ހޯދި ފަދަ ނަތީޖާތަކެއް މާޒިޔާގައި ތަކުރާރުކުރެވިދާނެތޯ ސުވާލުކުރުމުން ވިޑަކޮވިޗް ބުނީ ޔަގީންކަމެއް ދެވޭނީ ކުރާނެ މަސައްކަތަށް ކަމަށެވެ.
ފިިލިޕީންސްގެ ސެރެސްގައި މިހާތަނަށް އޭނާ ހުރި އަހަރުތަކުގައި އެ ޓީމަށް ތިން ފަހަރު ފިލިޕީންސް ލީގު ކާމިޔާބުކޮށްދިނުމުގެ އިތުރުން ކޮންމެ ފަހަރަކު އޭއެފްސީ ކަޕްގެ އާސިއާން ޒޯންގެ ފައިނަލުގައި ކުޅެއެވެ. އެއް ފަަހަރު އޭއެފްސީ ޗެމްޕިއަންސް ލީގުގެ ކޮލިފައިންގައި ވެސް ވާދަކުރި އެވެ. ސްޕެއިނުގެ ރެއާލް ބެޓިސް އާއި އޮސަސޫނާ އަށް ކުރިން ކުޅުނު ވިޑަކޮވިޗް ގެންނަން އެންމެ ބޭނުންވި އެއް ސަބަބަކީ ވެސް ސެރެސްގައި އޭނާ ކޮށްފައިވާ މަސައްކަތުގައި އޭއެފްސީ ކަޕްގައި ރަނގަޅު ރެކޯޑެއް އޮތުމެވެ. މާޒިޔާ އިން މި ފަހަރުގެ އޭއެފްސީ ކަޕްގެ ގްރޫޕް ސްޓޭޖުގައި ވާދަކުރާއިރު، ސެރެސްގައި ހޯދި ފަދަ ނަތީޖާތަކެއް މާޒިޔާގައި ތަކުރާރުކުރެވިދާނެތޯ ސުވާލުކުރުމުން ރިޑަކޮވިޗް ބުނީ ޔަގީންކަމެއް ދެވޭނީ ކުރާނެ މަސައްކަތަށް ކަމަށެވެ.
މި ވަގުތަށް ބަލާއިރު ބޭނުންވާ ދެ ކަންތަކުގެ ތެރެއިން އެއް ކަމެއް މި އޮތީ. އެއީ ކުރެވޭނެ ބުރަ މަސައްކަތް. ނެތީ ވަގުތު. އަހަ ރެމެން އެބަޖެހޭ އެންމެ ފުރަތަމަ ދުވަހުން ފެށިގެން ވެސް ބުރަކޮށް ނަތީޖާ ނެރެން މަސައްކަތްކުރަން.
– ވިޑަކޮވިޗް ބުނެފައިވެއެވެ.
މާޒިޔާ އިން މިދިޔަ ސީޒަނުގެ އޭއެފްސީ ކަޕްގެ ކޮލިފައިން ބުރުގައި އިންޑިއާގެ ގަދަބާރު ބެންގަލޫރުގެ މައްޗަށް ހޯދި މޮޅަށް ވިޑަކޮވިޗް ވަނީ ތައުރީފުކޮށްފަ އެވެ. އޭނާގެ އުއްމީދަކީ އެ ލެވަލްގެ ކުޅުން ތަކުރާރުކޮށް މާޒިޔާ އެއް ހަރުފަތް މައްޗަށް ޖައްސާލައިދޭން އެހީތެރިވުމެވެ.
ހުރިހާ ކަމެއް ރަނގަޅަށް ކުރި ނަމަވެސް ނަސީބެއް ނެތިއްޔާ މޮޅުނުވެދާނެ. އެކަމަކު ކޮންމެ މެޗެއްގައި ވެސް މޮޅުވެވޭނެ ފެންވަރަށް މި ކުޅުންތެރިންގެ މަސައްކަތުގެ ރޭޓް ބަހައްޓަން އެ ލެވަލް ހިފަހައްޓައިފިއްޔާ ކުރެވޭނެ ކަންތައް އެބަހުރި.
– ވިޑަކޮވިޗް ބުނެފައިވެއެވެ.
ޗެމްޕިއަނުންގެ ގޮތުގައި އޮންނާނެ ޕްރެޝަރާ ބެހޭގޮތުން ސުވާލުކުރުމުން ވިޑަކޮވިޗް ބުނީ ފުޓްބޯޅައިގައި ވެސް ދިރިއުޅުމުގެ ކޮންމެ ކަމެއްގައި ވެސް ޕްރެޝަރު އޮންނާނެ ކަމަށެވެ.
އެ ގޮތަށް ބަލާއިރު އެހެން އެންމެން ތިއީ އެންމެ މޮޅު ޓީމުގެ ގޮތުގައި ދެކޭއިރު އެ ހިސާބަށް ހުރި އުއްމީދުތަކާ އެއްވަރަށް ކުޅުމުގެ ޕްރެޝަރު ވެސް އޮންނާނެ. އަހަރެންގެ ނަޒަރުގައި ދިރިއުޅުމުގެ ކޮންމެ ކަމެއްގައި ވެސް ޕްރެޝަރު އޮންނާނެ.
– ވިޑަކޮވިޗް ބުނެފައިވެއެވެ.
ކުރިން ސާބިއާ ގައުމީ ޓީމުގައި އެސިސްޓަންޓެއްގެ ގޮތުގައި އަދި ސްޕެއިނުގެ ކްލަބްތަކުގައި ކޯޗެއްގެ ގޮތުގައި މަސައްކަތްކުރި ވިޑަކޮވިޗް މާޒިޔާއާ ހަވާލުވާނީ ކުރިއަށް އޮތް މެޗުން ފެށިގެންނެވެ.
ކޮމެންޓު ފޮނުވާ