ސިންގަޕޫރާއި ދިވެހިރާއްޖެ ގުޅިގެން އިންވެސްޓްމަންޓް ކުރިއަރުވައި، މޫސުމަށް އަންނަ ބަދަލުތަކާ ދެކޮޅަށް މަސައްކަތް ކުރާނެ ކަމަށް ސިންގަޕޫރުގެ ތިމާވެއްޓާ ބެހޭ ވަޒީރު ގްރޭސް ފޫ ހައި ޔެއިން ވިދާޅުވެއްޖެއެވެ.
ދިވެހިރާއްޖެ-ސިންގަޕޫރު ބިޒްނަސް ފޯރަމްގައި ވާހަކަފުޅު ދައްކަވަމުން އޭނާ ފާހަގަކުރެއްވީ، ދެ ޤައުމަކީވެސް މޫސުމީ ބަދަލުތަކަށް ވަރަށް ނާޒުކު، ޤުދުރަތީ ވަސީލަތްތައް މަދު، އަދި ބޭރުން އިމްޕޯޓްކުރާ ކާބޯތަކެތީގެ މައްޗަށް ބަރޯސާވެފައިވާ ޤައުމުތަކެއް ކަމަށެވެ. މި ސަބަބުތަކާހުރެ، މި ގޮންޖެހުންތަކުން އަރައިގަތުމަށްޓަކައި ބައިނަލްއަޤްވާމީ ފެންވަރުގައި އެކުގައި ވަކާލާތު ކުރުމުގެ މުހިންމުކަން އޭނާ ވަނީ ފާހަގަކުރައްވާފައެވެ.
ސިންގަޕޫރާއި ދިވެހިރާއްޖެއަކީ ބައިނަލްއަޤްވާމީ މައިދާނުގައި އެއްގައުމު އަނެއް ގައުމަށް އެއްބާރުލުން ދެވޭނެ ދެގައުމުކަން ފާހަގަކުރައްވަމުން، ޚާއްޞަކޮށް މޫސުމީ ބަދަލުތަކުގެ ސަބަބުން ކުދި ޤައުމުތަކަށް ކުރިމަތިވާ ގޮންޖެހުންތަކާ ގުޅޭގޮތުން ވަކާލާތު ކުރުމުގައި ދެ ޤައުމު އެކުގައި މަސައްކަތް ކުރާކަން އޭނާ ވިދާޅުވިއެވެ.
އިންވެސްޓްމަންޓްގެ ދާއިރާއިން ދެ ޤައުމުގެ ގުޅުން ވަރުގަދަވަމުންދާކަން ފާހަގަކުރައްވަމުން، މިހާރުވެސް 50 ދިވެހި ވިޔަފާރިއެއް ސިންގަޕޫރުގައި ޤާއިމުކޮށްފައިވާކަން އޭނާ ވިދާޅުވިއެވެ. އަދި ސިންގަޕޫރުގެ އިންވެސްޓަރުންވެސް ދިވެހިރާއްޖޭގައި އިންވެސްޓްކުރުމަށް ދައުވަތު އަރުވާކަމަށް ވިދާޅުވިއެވެ.
އާބަން ޕްލޭނިންގ، އިންފްރާސްޓްރަކްޗަރ ޑިވެލޮޕްމަންޓް އަދި ޑިޖިޓަލް ޚިދުމަތްތަކުގެ ދާއިރާތަކުން ސިންގަޕޫރުގެ ތަޖުރިބާ ދިވެހިރާއްޖެއާ ހިއްސާކުރުމަށް ތައްޔާރުވެފައިވާކަން އޭނާ ފާހަގަކުރެއްވިއެވެ. މީގެ އިތުރުން، ލޯ ކާބަން ޓްރާންސިޝަނަށް ކުންފުނިތަކަށް ސަރުކާރުގެ އެހީތެރިކަން ފޯރުކޮށްދިނުމާއި، ދެމެހެއްޓެނިވި ތިމާވެށީގެ ހިމާޔަތާ ގުޅޭގޮތުން ދެ ޤައުމުގެ ދެމެދުގައި ތަޖުރިބާ ބަދަލުކުރުމަށް އެމްއޯޔޫއެއްގައި ސޮއިކޮށްފައިވާކަން ވެސް އޭނާ ހާމަކުރެއްވިއެވެ.
ކުރިއަށް އޮތް 50 އަހަރުގައި ދެ ޤައުމުގެ ސިޔާސީ ގުޅުން އިތުރަށް ބަދަހިކުރުމަށް މަސައްކަތްކުރާނެކަމަށް ވިދާޅުވެ، ސިންގަޕޫރުގެ ވިޔަފާރިތަކުން ދިވެހި ކުންފުނިތަކާ ގުޅިގެން މަސައްކަތްކުރުމަށް ގޮވާލެއްވިއެވެ. ސިންގަޕޫރުން ދިވެހިރާއްޖެއަށް ހުރިހާ ދާއިރާއަކުންވެސް ފުރިހަމަ އެއްބާރުލުން ފޯރުކޮށްދޭނެކަމުގެ ޔަޤީންކަން އޭނާ ވަނީ ދެއްވާފައެވެ.
ކޮމެންޓު ފޮނުވާ