ދިރާގު ދިވެހި ޕްރިމިއާ ލީގުގައި މިއަދު ހަވީރު ސުޕަ ޔުނައިޓެޑް ސްޕޯޓްސް (ސަސް) އާއި ކްލަބް ގްރީން ސްޓްރީޓްސް ވާދަކުރި މެޗު 0-0 އިން އެއްވަރުވެއްޖެއެވެ.
މިއަދުގެ މެޗުގެ ފުރަތަމަ ހާފުގައި ދެޓީމުގެ ފަރާތުން ވެސް ފެނުނީ އެޓޭކްތައް މަދު ކުޅުމެކެވެ. މެޗުގެ ދެ ވަނަ ހާފުގެ ކުރީކޮޅު ގްރީން ސްޓްރީޓްސް އިން ވަނީ މޮޅަށް ކުޅެ ހަމަލާތައް ގިނަކޮށްފައެވެ. އެކަމަކު އެޓީމަށް އުފަންދަން ލިބުނު ފުރުސަތުތައް ސަސްގެ ގޯލަށް ނުރައްކާ ކުރެވޭގޮތެއްނުވިއެވެ. މި ހާފުގައި ގްރީން ސްޓްރީޓްސްގެ ހަސަން ނަޒީމް (ޗޯޓު) އަށް ގޯލަށް ޖަހަން ލިބުނު ރަނގަޅު ފުރުސަތެއްގައި ފޮނުވާލި ބޯޅަ ދިޔައީ ގޯލާ އަމާޒުނުވެ އެވެ. މި ހާފުގައި ސަސް އަށް ވަނީ ގޯލު ޖަހާނެ ރަނގަޅު ފުރުސަތުތަކެއް ލިބިފަ އެވެ. މިގޮތުން 60 ވަނަ މިނެޓުގައި އެޓީމުގެ ސްޕެއިން ފޯވާޑް ރޮޑްރިގޭޒް މުނޯޒް ވިކްޓަ ފޮނުވާލި ބާރު ބޯޅަ ގްރީން ސްޓްރީޓްސްގެ ގޯލްކީޕަރު ސާގިބް ހަނީފް މަތަކޮށްފައެވެ.
ލީގުގައި މިހާތަނަށް ކުޅުނު ހަތަރު މެޗުން ގްރީން ސްޓްރީޓްސް އަށް މޮޅެއް ލިބިފައެއްނުވެއެވެ. އަނެއްކޮޅުން ފުރަތަމަ ޑިވިޝަނުގައި އަލަށް ވާދަކުރާ ސަސް އިން މިވަނީ ލީގުގައި ބަލިނުވެ ހަތަރު މެޗު ހަމަކޮށްފައެވެ. މިއަދު ލިބުނު ޕޮއިންޓާ އެކު ހަ ޕޮއިންޓް ހަމަކޮށް ސަސް ތާވަލުގެ ތިން ވަނަ އަށް ކުރިއަށް ޖެހިލިއިރު ގްރީން ސްޓްރީޓްސް ވަނީ ދެ ޕޮއިންޓާ އެކު ހަ ވަނަ އަށް ކުރިއަށް ޖެހިލާފައެވެ. ލީގުގެ އެއް ވަނައިގައި އޮތް މާޒިޔާ އާއި ދެ ވަނައިގައި އޮތް ވެލެންސިއާ އަށް ލިބިފައިވަނީ ހަ ޕޮއިންޓެވެ.
ކޮމެންޓު ފޮނުވާ