ގްރީން ސްޓްރީޓްސްއާ ދެކޮޅަށް ނުކުންނައިރު ދެކެނީ އެއީ ލީގުގެ ވަރުގަދަ ޓީމެއްގެ ގޮތުގައި ކަމަށާއި އަމާޒަކީ އެ ޓީމު އަތުން މަދުވެގެން ޕޮއިންޓެއް ވިޔަސް ހޯދުން ކަމަށް ސުޕަ ޔުނައިޓެޑް ސްޕޯޓްސް (ސަސް)ގެ ކޯޗު އަހުމަދު ނާޝިދު (ނާދު) ބުނެފިއެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި ނާދު ބުނީ ގްރީން ސްޓްރީޓްސްއާ ދެކޮޅަށް ކުޅެން ތައްޔާރުވާއިރު އެންމެ ބޮޑު ބޭނުމަކީ ހާލަތުގެ ގޮތުން ބަލިނުވެ ފަރުޖައްސާލުމަށް އިސްކަން ދިނުން ކަމަށެވެ. ދިގު ލީގެއްގައި ކުޅޭއިރު އަނިޔާގެ މައްސަލަތައް ކުރިމަތިވާނެކަން ގަބޫލުކުރަންޖެހޭ ކަމަށާއި އެހެން ނަމަވެސް ތިބި ކުޅުންތެރިންގެ ހިތްވަރާ އެކު ނަތީޖާ ނެރެވޭނެކަމަށް ނާދު ގަބޫލުކުރެ އެވެ.
ގްރީން ސްޓްރީޓްސް އަކީ މި މުބާރާތުގައި ކުޅޭ އެންމެ ވަރުގަދަ އެއް ޓީމު. މެޗުތަކަކުން ބަލިވި ކަމުގައި ވިޔަސް އެއީ ލީގުގައި ވާދަކުރާ ވަރުގަދަ ޓީމެއް. އެކަން ދެނެތިބެގެން މި މެޗަށް ނުކުންނަނީ. ކުޑަމިނުން މެޗުން ބަލިނުވެ ނިންމާލަން މި ނުކުންނަނީ.
– ނާދު ބުނެފައިވެއެވެ.
ސަސްގެ ސްޕެއިން ފޯވާޑް ވިކްޓަ ރޮޑްރިގޭޒްގެ ބޭނުން އެންމެ ރަނގަޅަށް ނުހިފޭ އެއް ސަބަބެއްގެ ގޮތުގައި ފާހަގަކުރެވެނީ ރަނގަޅު ޕްލޭމޭކަރެއް މެދުތެރެއިން ނެތުން ކަމަށާއި ދެން އޮންނަ ޓްރާންސްފާ މާކެޓްގައި އެ މަގާމާ މެދު ވިސްނަން ޖެހޭ ކަމަށް އޭނާ ބުނިއެވެ. ފުރަތަމަ މެޗުން އީގަލްސް އަތުން ސަސް މޮޅުވިއިރު، ދެން ކުޅުނު ދެ މެޗުން ދަ ގްރާންޑޭ ސްޕޯޓްސް ކްލަބާއި ޓީސީ ސްޕޯޓްސް ކްލަބާ ވަނީ އެއްވަރުވެފަ އެވެ. އެގޮތުން މިހާތަނަށް ކުޅުނު ތިން މެޗުން ލިބުނު ފަސް ޕޮއިންޓާއެކު ސަސް އޮތީ ތާވަލުގެ ހަތަރުވަނައިގައެވެ.
ކޮމެންޓު ފޮނުވާ