ލިވަޕޫލުގައި މަޑުކުރުމާ މެދު ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް މި ހަފުތާގައި ވަކިގޮތެއް ނިންމާނެ ކަމަށް ރިޕޯޓުތައް ބުނެފިއެވެ.
ވައިނަލްޑަމް މި ވަގުތު ލިވަޕޫލުގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. އެހެންކަމުން ލިވަޕޫލުން އަންނަނީ އޭނާގެ އެއްބަސްވުން އާކުރުމަށް މަސައްކަތް ކުރަމުންނެވެ. ވައިނަލްޑަމަށް ބާސާއިން ޝައުގުވެރިވި ނަމަވެސް، ރިޕޯޓުތައް ބުނާ ގޮތުން ވައިނަލްޑަމް ބޭނުންވަނީ ދިގު މުއްދަތަކަށް ލިވަޕޫލުގައި މަޑުކުރުމަށެވެ. އެހެންކަމުން މި ހަފުތާގައި އެއްބަސްވުމާ ގުޅޭ ގޮތުން ވައިނަލްޑަމް ވަކިގޮތެއް ނިންމާނެ ކަމަށްވެސް ވަނީ ރިޕޯޓުކޮށްފައެވެ.
ވައިނަލްޑަމް ހޯދުމަށް ބާސެލޯނާއިން އަންނަނީ މަސައްކަތް ކުރަމުންނެވެ. ވައިނަލްޑަމަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. އަދި މީގެ ކުރިން ބަޔާން މިއުނިކް ކުޅެމުން އައި ސްޕެއިނުގެ މިޑްފީލްޑަރު ތިއާގޯ އަލްކަންޓާރާ ހޯދުމަށްވެސް ބާސާއިން މަސައްކަތް ކުރިއިރު، މިދިޔަ ހޫނު މޫސުމުގެ ޓްރާންސްފާގައި އޭނާ ބަދަލުވީ ލިވަޕޫލަށެވެ. އެހެންކަމުން ވައިނަލްޑަމް ހޯދުމަށް މިދިޔަ ޓްރާންސްފާގައިވެސް ބާސާއިން ވަނީ މަސައްކަތް ކޮށްފައެވެ.
ނިއުކާސަލް ޔުނައިޓެޑުން ކުޅުނު ވައިނަލްޑަމް ލިވަޕޫލަށް ބަދަލުވީ 2016 ވަނަ އަހަރުއެވެ.
ކޮމެންޓު ފޮނުވާ