އެތުލެޓިކޯ އިން ލިގުގެ އެއްވަނައިގަ ދެ ޕޮއިންޓުގެ ލީޑެއް

ސްޕެނިސް ލަލީގާގައި ގެޓާފޭ ބަލިކޮށް އެއްވަނައިގަ އޮވެ އެތުލިޓިކޯއިން އަހަރު ނިންމާލައިފިއެވެ.

އަމިއްލަ ދަނޑުގައި ކުޅުނު މެޗުން އެތުލިޓިކޯ މެޑްރިޑު މޮޅުވީ 1-0 ލަނޑުންނެވެ. މެޗުގައި ފެނިގެންދިޔަ ހަމައެކަނި ލަނޑު އެތުލިޓިކޯއިން ޖެހީ މެޗުގެ ފުރަތަމަ ހާފްގައި ލުއިސް ސުއަރޭޒްއެވެ. ރޭގައި ޖެހި ލަނޑާއެކު ސުއަރޭޒް ވަނީ އެތުލެޓިކޯއަށް ކުޅުނު ފުރަތަމަ 11 މެޗުން 8 ލަނޑު ކާމިޔާބުކޮށްފައެވެ. އެއީ އެތުލިޓިކޯގެ ކުރީގެ ފޯވާޑް ރަޑަމަލް ފަލްކޯއާއި ޖެހި އަދަދާއި އެއްވަރު އަދަދެކެވެ.

ރޭގެ ހޯދި މޮޅާއެކު އެތުލިޓިކޯ ކޯޗެއްގައި ގޮތުގައި ސިމިއޯނީ ހޯދި މޮޅުގެ އަދަދު ވަނީ 500 އަށް އަރާފައެވެ. އަދި މިއީ ކޯޗެއްގެ ގޮތުގައި ލީގުގައި އޭނާ އެތުލިޓިކޯއަށް ހޯދައިދިން 300 ވަނަ މޮޅެވެ. ޑިއޮގޯ ސިމިއޯނީ ވަނީ 2014 ވަނަ އަހަރު ލަލީގާ އެޓީމަށް ކާމިޔާބުކޮށްދީފައެވެ.

ރޭގައި ލީގުގައި ސެލްޓަވީގޯ އިން ވަނީ ހެއުސްކާގެ މައްޗަށް ކުރިހޯދާފައެވެ. ގްރެނޭޑާ އިން ވަނީ ތިން ރަތްކާޑު ފެނުނު މެޗުގައި ވެލެންސިޔާގެ މައްޗަށް ކުރިހޯދާފައެވެ. މި ނަތީޖާއެކު ލީގުގެ ކުރީގަ އެތުލެޓިކޯ އޮތީ އެންމެފަހުގެ ޗެމްޕިއަން ރެއާލް މެޑްރިޑްއަށް ދެ ޕޮއިންޓް އިތުރަށް ހޯދައިގެންނެވެ. އެތުލެޓިކޯ އެއްވަނައިގަ އޮތީ 14 މެޗުން 35 ޕޮއިންޓް ހޯދައިގެންނެވެ. މެޑްރިޑު ދެވަނައިގަ އޮތީ 16 މެޗުން 33 ޕޮއިންޓާއެކުއެވެ.

ރެއާލް ސޮސެއިޑާޑް ތިންވަނައިގަ އޮތީ 16 މެޗުން 26 ޕޮއިންޓް ހޯދައިގެންނެވެ. ސެވިއްޔާއަށް 14 މެޗުން ހަމަ އެދަދަށް ޕޮއިންޓް ހޯދައިގެން ލަނޑުގެ ތަފާތުން އޮތީ ހަތަރުވަނައިގައެވެ. ސްޕެއިން ގަދަބާރު ބާސެލޯނާ އަހަރު ނިންމާލީ 15 މެޗުން 25 ޕޮއިންޓް ހޯދައިގެން 6 ވަނައިގައެވެ. މިއީ 7 ވަނައިގަ އޮތް ގްރެނޭޑާއަށް ވުރެ އެއްޕޮއިންޓް އިތުރު އަދަދެކެވެ. އަދި 8 ވަނައިގަވާ ސެލްޓާ ވީގޯއަށް ވުރެ ދެ ޕޮއިންޓް އިތުރު އަދަދެކެވެ.