މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތަންފީޒުކުރި މޯލްޑިވްސް އިންސްޓަންޓް ޕޭމަންޓް ސިސްޓަމް – ފަވާރާގެ ބައިވެރިންގެ ގޮތުގައި އިތުރު ތިން ޚިދުމަތްދޭ ފަރާތެއް ވަނީ ބައިވެރިވެފައެވެ.
އެމްއެމްއޭ އިން ބުނީ ހަބީބް ބޭންކް ލިމިޓެޑް (އެޗްބީއެލް)، ކޮމާޝަލް ބޭންކް އޮފް މޯލްޑިވްސް (ސީބީއެމް)، އަދި ދިރާގު ފިންޓެކް ޕްރައިވެޓް ލިމިޓެޑް (ދިރާގު ފިންޓެކް) އަކީ ފަވާރާއާ ގުޅުނު އައު ޚިދުމަތްދޭ ފަރާތްތައް ކަމަށެވެ.
މިއާއެކު، ދިރާގު ފިންޓެކް ވެގެންދަނީ ފަވާރާގެ ފުރަތަމަ ބޭންކް ނޫން ޕޭމަންޓް ސަރވިސް ޕްރޮވައިޑަރ (ޕީއެސްޕީ) އަށެވެ. މި ތިން ބައިވެރިން ވެސް ވަނީ ޕައިލެޓް ޓެސްޓިންގ އަދި އެހެނިހެން ހުރިހާ ޝަރުތުތައް ފުރިހަމަކޮށްފައެވެ.
ފަވާރާއާ ގުޅުމާއެކު، އެޗްބީއެލް އަދި ސީބީއެމް، އަދި ދިރާގު ފިންޓެކްގެ ކަސްޓަމަރުންނަށް މިހާރު ފަވާރާ ޓްރާންސްފަރ، ފަވާރާ ރިކުއެސްޓް، ފަވާރާ އައިޑީ، އަދި ފަވާރާ ރިކޯލް ހިމެނޭ ފަވާރާގެ ހުރިހާ ޚިދުމަތްތަކަށް ވާޞިލުވެވޭނެއެވެ.
މިއީ މުހިންމު ކުރިއެރުމެއްގެ ގޮތުގައި ފާހަގަކުރެވެނީ، މިހާރު ރާއްޖޭގައި ހިންގާ ހުރިހާ ބޭންކުތަކަކީ ފަވާރާގެ ބައިވެރިން ކަމަށްވުމާއެކު، ކޮންމެ ބޭންކެއްގައި ހުޅުވާފައިވާ އެކައުންޓުތަކާ ދެމެދު ފަސޭހަކަމާއެކު މުޢާމަލާތްތައް ކުރެވޭނެތީއެވެ.
އިތުރު ޕީއެސްޕީތަކެއް ވެސް މިވަގުތު ފަވާރާއާ ގުޅުމަށްޓަކައި ތަރައްޤީކުރަންޖެހޭ ކަންކަން ފުރިހަމަކުރަމުންދެއެވެ.
