ޗެމްޕިއަންސް ލީގު މިފަހަރު އިޓަލީ ޗެމްޕިއަން ޔުވެންޓަސް އާއި ސްޕެއިންގެ ބާސެލޯނާ އެއް ގުރޫޕެއްގައި ލައްވައިލައިފިއެވެ.
މުބާރާތް ފަސްފަހަރު ކާމިޔާބުކޮއްފަވާ ބާސެލޯނާއީ ޔުވެންޓަސްގެ އިތުރުން މިދީޓީމުގެ ވާދެވިކަމަށްވުރެ ބޮޑަށް ފާހަގަކުރެވެނީ ޔުވެންޓަސްގެ ކްރިސްޓިއާނޯ ރޮނާލްޑޯ އާއީ މެސީގެ ކުރިމަތިލުމެއްގެ ގޮތުގައިއެވެ. މިއީ ޔުވެންޓަސް އަށް ރޮނާލްޑޯ ބަދަލުވިފަހުން މިދެއްކުޅުންތެރިން ކުރިމަތިލާނެ ފުރަތަމަ ފަހަރުއެވެ. މިގުރޫޕްގައި ދެން ހިމެނެނީ ޔުކްރޭއިންގެ ޑައިނަމޯ ކިއޭވް އާއި ހަންގޭރީގެ ފްރެންސްވަރުޝީއެވެ.
މުބާރާތް 13ފަހަރު ކާމިޔާބުކޮއްފަވާ ރެއާލްމެޑްރިޑް ހިމެނެނީ ޔުކްރެއިން ޝަކްތާރް ޑޮންސްޓޭކް އާއި މުބާރާތް ތިންފަހަރު ކާމިޔާބުކޮއްފައިވާ އިންޓަމިލާން އާއި ޖަރުމަނުގެ ބްރޫޝިޔާ މޮންހަލްބަޗްއާއެކު އެއްގުރޫޕެއްގައެވެ. މުބާރާތުގެ އެންމެފަހުގެ ޗެމްޕިއަން ބަޔާންމިއުނިކް އެތުލިޓިކޯ މެޑްރިޑާއި ސަލްޒްބާގް އަދި ލޮކެމޯޓިވް މޮސްކޯ ލައްވާލި އެއްގުރޭޕެއްގައެވެ. މުބާރާތުގެ އެންމެފަހު ރަނަރަޕް ޕީއެސްޖީ އާއި މެންޗެސްޓައި ޔުނައިޓެޑް ވަރުގަދަ ގުރޫޕެއްގައި ވަނީ ލައްވާލައިފައެވެ.
ދެން މި ގުރޫޕްގައި ހިމެނެނީ ހުސްވި ސީޒަނުގައި މުބާރާތުގެ ސެމީ ފައިނަލުގައި ފުރަތަމަ ފަހަރަށް ވާދަކުރި ލީޕްޒީގްގެ އިތުރުން ތުރުކީގެ ޗެމްޕިއަން ބަސަކްޝީރެވެ. މުބާރާތް ހަފަހަރު ކާމިޔާބުކޮއްފަވާ ލިވާޕޫލްވެސް ލައްވާލީ އުނދަގޫ ގުރޫޕެއްގައެވެ. ލިވަޕޫލްގެ އިތުރުން ގުރޫޕްގައި ހިމެނެނީ ހޮލެންޑްގެ އަޔެކްސް އާއި އިޓަލީގެ އެޓްލާންޓާގެ އިތުރުން ޑެންމާކްގެ އެފްސީ މިޑްޓިލޭންޑެވެ. އިނގިރޭސިވިލާތުގެ މެންޗެސްޓަރ ސިޓީ ލައްވާލީ ޕޯތޯ އާއި އޮލިންޕިއާކޯސްގެ އިތުރުން ފްރާންސްގެ މާސޭއާ އެއްގުރޫޕެއްގައެވެ. ޗެލްސީ ލައްވާލީ ނިސްބަތުން ފައްސޭހަ ގުރޫޕެއްގައެވެ.
މި ގުރޫޕްގައި ޗެލްސީގެ އިތުރުން ދެންހިމެނެނީ ހުސްވި ސީޒަންގެ ޔުރަޕާ ލީގުގެ ޗެމްޕިއަން ސެވިއްޔާ އާއި ރަޝިޔާގެ ރެސްނޯޑާގެ އިތުރުން ފްރާންސްގެ ރެންނޭސްއެވެ. ރަޝިޔާގެ ޒެނިތު އާއި ޖަރުމަނުގެ ބުރޫޝިޔާޑޯޓްމަންޑާއި އިޓަލީގެ ލާޒިޔޯ އަދި ބުރޫޖް ލައްވާލީ އެއް ގުރޫޕެއްގައިއެވެ. މި ސީޒަނުގެ ޗެމްޕިއަންސްލީގު ފައިނަލު އޮންނާނީ އަންނަ އަހަރު މޭމަހުގެ 29 ވަނަ ދުވަހު ތުރިކީގެ އިސްތަންބޫލްގައެވެ. މުބާރާތުގެ ގުރޫޕް ސްޓޭޖުގެ މެޗުތަކުގެން ކުޅުން ފަށާނީ މިމަހު 20 އަދި 21 ވަނަ ދުވަހުއެވެ.
ކޮމެންޓު ފޮނުވާ