މާލެ ސަރަހައްދުގެ ވައި މިހާރު ވަނީ އާންމު ސިއްހަތަށް ނުރައްކާވާ މިންވަރަށް ނުސާފުވެފައެވެ. ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވައިގެ ސާފްމިން ބެލުމަށް ބޭނުންކުރާ "އައިކިއުއެއާ" އިން ދައްކާ ގޮތުން މާލެ ސަރަހައްދުގެ ވައި ހުރީ އާންމުކޮށް އެންމެންނަށް ނުރައްކާވާ މިންވަރަށް ކިލަނބުވެފައެވެ.
އައިކިއުއެއާގައި ވައިގެ ސާފްމިން ބެލުމަށް ކަނޑައަޅާފައިވާ މިންގަނޑުތަކުގައި ސުމަކުން ފެށިގެން 300 އާ ހަމައަށް އަދަދު މަތިވަމުންދާ މިންވަރަކަށް، ވައިގެ ނުސާފްމިން އިތުރުވާކަން އަންގައިދެއެވެ. މިހާރު މާލެ ސަރަހައްދުގެ ވައިގެ ނުސާފްމިން ހުރީ 152 އަށްވުރެ މަތީގައެވެ. މި މިންވަރަކީ އާންމުކޮށް އެންމެންގެ ފުއްޕާމެއަށް އަސަރުކޮށް ސިއްހީ ހާލަތެއް ދިމާވުމުގެ ފުރުސަތު ބޮޑު މިންވަރެކެވެ.
މި ހާލަތާ ގުޅިގެން އެޗްޕީއޭއިން ވަނީ ފުއްޕާމެއާއި ހިތުގެ ބަލިތައް ހުންނަ ފަރާތްތަކުން ބޭރުގައި ގިނަވަގުތު ހޭދަކުރުން ރަނގަޅު ނޫން ކަމަށް އިލްތިމާސްކޮށްފައެވެ. އަދި ބޭރަށް ނިކުންނަ ނަމަ މާސްކު އެޅުމަށާއި، ގޭގެ ދޮރުތައް ބަންދުކޮށްފައި ބެހެއްޓުމަށާއި، ކުޑަކުދިން ބޭރަށް ނެރުން މަދުކުރުމަށް ވެސް އިލްތިމާސްކޮށްފައިވެއެވެ.
ރާއްޖޭގައި ވައިގެ ސާފްމިން ބެލުމަށް އެންވަޔަރަމެންޓް މިނިސްޓްރީން ވަނީ ފަސް ސަރަހައްދެއްގައި ވަސީލަތްތައް ގާއިމްކޮށްފައެވެ. އެއީ ށ. ފުނަދޫ، ވިލިމާލެ، ލ. ގަން، ފުވައްމުލައް އަދި އައްޑޫ ސިޓީގައެވެ.
ކޮންމެ އަހަރެއްގެ ވެސް ކުރީކޮޅު ވައި ނުސާފްވުމުގެ މައްސަލަ ދިމާވެއެވެ. މި ދުވަސްވަރު ދުރު ފެންނަ މިންވަރު ވެސް ދަށްވެއެވެ. އާންމުކޮށް މޫސުން ރަނގަޅު ނަމަ ރާއްޖޭގައި ދުރު ފެންނަ މިންވަރަކީ ގާތްގަނޑަކަށް 10 ކިލޯ މީޓަރު ނަމަވެސް، ޑިސެމްބަރު މަހުން ފެށިގެން މާޗްމަހުގެ ނިޔަލަށް 4-5 ކިލޯމީޓަރާ ހަމައަށް ދުރުފެންނަ މިންވަރު ދަށްވެއެވެ.
