މިދިޔަ ބުރާސްފަތި ދުވަހު ތިން މިނިސްޓްރީއެއްގައި އާއި މާލެ ސިޓީ ކައުންސިލްގެ އޮފީހެއްގައި ހިނގި އަލިފާނުގެ ހާދިސާގައި އެ ތަންތަން ބޭނުން ނުކުރެވޭ ވަރަށް އެނދުމާ ގުޅިގެން ދަރުބާރުގޭގައި މިނިސްޓްރީތަކުގެ ސެޓަޕް ހެދުމުގެ މަސައްކަތް ފަށައިފިއެވެ.
މި މަސައްކަތުގައި އެންމެ ބޮޑު އެހީތެރިކަމެއް ފޯރުކޮށްދެމުން އަންނަ ބަޔަކީ އެމްޓީސީސީއެވެ.
އަލިފާނުގެ ހާދިސާގައި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ވަނީ އަނދައިފައެވެ.
އެމްޓީސީސީން އެކްސްގައި ކުުރި ޕޯސްޓެއްގައި ބުނީ އަލިފާނުގެ ހާދިސާގެ ސަބަބުން ގެއްލުން ލިބުނު މިނިސްޓްރީތަކަށް ދަރުބާރުގޭގައި ވަގުތީ ވަސީލަތްތައް ގާއިމްކުރުމުގެ މަސައްކަތް ކުރަމުން އަންނަ އިރު، އެފަރާތްތަކަށް އެހީތެރިކަން ފޯރުކޮށްދެމުން އަންނަ ކަމަށެވެ.
އަލިފާނުގެ ހާދިސާގައި ގެއްލުން ލިބިފައިވާ އިމާރާތްތައް ސާފުކުރުމުގައިވެސް އެމްޓީސީސީގެ ޓީމުގެ ފަރާތުން ވަރަށް ބޮޑަށް މަސައްކަތް ކުރާނެ ކަމަށް އެމްޓީސީސީން ބުންޏެވެ.
އަމީނީ މަގު، ދިވެހިރާއްޖޭގެ އަޑު ކުރިމަތީގައި ހުންނަ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގައި ހިނގި އަލިފާނުގެ ހާދިސާގައި އެ ދެ ތަން ބޭނުން ނުކުރެވޭ ވަރަށް ވަނީ އަނދައިފައެވެ. އަދި އެ އިމާރާތާ ކައިރީގައި ހުންނަ ގްރީން ބިލްޑިންގައި ވެސް އަލިފާން ރޯވެ ގެއްލުންވެފައެވެ. ގްރީން ބިލްޑިންގައި ހިންގަމުން އައީ އެންވަޔަރަމަންޓް މިނިސްޓްރީ އާއި އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އެވެ. އެ އިމާރާތުގެ ބައެއް ފްލޯތައް ވަނީ އަނދައިފައެވެ.
އަލިފާނުގެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
