ރިސޯޓްތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރަންޖެހޭ ގޮތަށް އެމްއެމްއޭއިން އެކުލަވާލި ބޭރު ފައިސާއާ ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށާއި، އެމްއެމްއޭ އިން އިސްނަގައިގެން ބޭރު ފައިސާ އާއިބެހޭ ޤާނޫނެއް ހެދިގެން ދިއުމަކީ މުހިއްމުކަމެއް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. އެމްއެމްއޭއިން ވަނީ ރޭ މި ބިލު އާންމު ހިޔާލަށް ހުޅުވާލާފައެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވެފައިވަނީ 500 ޑޮލަރު މާރު ކުރަންޖެހޭ ގޮތަށް އެ ބިލުގައި އޮތުމަކީ ވަރަށް ރަނގަޅު ކަމެއް ކަމަށާއި އެކަމަށްޓަކައި އެމްއެމްއޭއަށް ޝުކުރު އަދާކުރައްވާ ކަމަށެވެ. އަދި ގަވާއިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭއިން އިސްނަގައިގެން ބޭރު ފައިސާއާ ބެހޭ ގާނޫނެއް ހެދިގެން ދިއުމަކީ މުހިއްމު ކަމެއްކަމަށް ވިދާޅުވިއެވެ.
ރައީސް އިތުރަށް ވިދާޅުވެފައިވަނީ ޓޫރިޒަމް ނޫން ދާއިރާތަކުން ވެސް ވަކި ވަރަކަށް ވުރެ ގިނައިން ޑޮލަރު އާމްދަނީ ލިބޭނަމަ، ބޭންކްތަކުން ޑޮލަރު މާރު ކުރަންޖެހޭ ގޮތަށް ހިމަނާފައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށް ވުރެ އިތުރުވެގެންދާނެ ކަމަށެވެ. މި ގާނޫނަށް ގެންނަ ބަދަލުތަކުގެ ނަތީޖާއެއްގެ ގޮތުން އާންމު ރައްޔިތުންނާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރު ލިބުން ފަސޭހަވެގެންދާނެ ކަމަށް ވެސް ރައީސް ވިދާޅުވެފައިވެއެވެ.
500 ޑޮލަރު މާރު ކުރަންޖެހޭ ގޮތަށް ބޭރު ފައިސާއާއި ބެހޭ ބިލުގައި އޮތުމަކީ ވަރަށް ރަނގަޅު ކަމެއް. އެކަމަށްޓަކައި އެމްއެމްއޭއަށް ޝުކުރުދަންނަވަން. އަދި 17 ނޮވެމްބަރ 2024 ގައި އަޅުގަނޑު ދެންނެވި ފަދައިން ގަވައިދު ތަންފީޒުކުރުން ވަރުގަދަ ކުރުމަށްޓަކައި އެމްއެމްއޭ އިން އިސްނަގައިގެން…
— Dr Mohamed Muizzu (@MMuizzu) November 27, 2024
2025 ވަނަ އަހަރުގެ ޖުލައި މަހުން ފެށިގެން ސަރުކާރުން ހިއްސާވާ ކުންފުނިތަކަށް ރަސްމީ ރޭޓުގައި ޑޮލަރު ލިބޭނެ އިންތިޒާމު ހަމަޖެހޭނެ ކަމަށާއި، 2026 ގެ ފުރަތަމަ ކުއާޓަރގައި ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް 1000 ޑޮލަރު ލިބޭނެ ގޮތް ހަމަޖެހޭނެ ކަމަށް ރައީސް ވިދާޅުވިއެވެ. މީގެ އިތުރުން، 2026 ގެ ފުރަތަމަ ކުއާޓަރގައި ކްރެޑިޓް ކާޑު ލިމިޓްތައް ބޮޑުކުރެވޭނެ ކަމަށާއި، 2025 ޖުލައި މަހުން ފެށިގެން ވިޔަފާރިވެރިންނަށް ތަކެތި އިމްޕޯޓްކުރުމަށް ބޭންކުތަކުން ދޫކުރާ ޓީޓީގެ ޑޮލަރުގެ ނިސްބަތް އިތުރުކުރެވޭނެ ކަމަށްވެސް ވިދާޅުވިއެވެ.
މި ބިލާ ގުޅިގެން އެމްއެމްއޭއިން ބޭއްވި ނޫސްވެރިންގެ ބައްދަލުވުމުގައި ގަވަރުނަރު އަހުމަދު މުނައްވަރު ވިދާޅުވެފައިވަނީ މިހާރު އޮތް ގަވާއިދަށް ގާނޫނީ ބާރު ދިނުން ފިޔަވައި އެއްވެސް ލުޔެއް ދީފައެއް ނުވާނެ ކަމަށެވެ. އަދި ކެޓަގަރީ "އޭ" ގައި ހިމެނޭ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކުން ކޮންމެ ޓޫރިސްޓަކަށް 500 ޑޮލަރު، އަދި ކެޓަގަރީ "ބީ" ގައި ހިމެނޭ ގެސްޓް ހައުސްތަކުން ކޮންމެ ޓޫރިސްޓަކަށް 25 ޑޮލަރު ބޭންކަކަށް މާރުކުރަން ޖެހޭނެ ކަމަށް ވިދާޅުވިއެވެ.
މީގެ އިތުރުން، ޓޫރިޒަމް ދާއިރާގައި ހަރަކާތްތެރިވާ ފަރާތްތަކަށް އިންސާފުވެރިވުމުގެ ގޮތުން، އާ ކެޓަގަރީއެއް ބިލުގައި ހިމަނާފައިވާ ކަމަށާއި، އެގޮތުން ޓޫރިޒަމް ދާއިރާގައި ނުހިމެނޭ ފަރާތްތަކުން އަހަރަކު 20 މިލިއަން އެމެރިކާ ޑޮލަރަށްވުރެ ގިނައިން ބޭރު ފައިސާ ލިބޭނަމަ، އެ އާމްދަނީގެ މަދުވެގެން 25 ޕަސެންޓް ރާއްޖޭގެ ބޭންކް އެކައުންޓަކަށް ޖަމާކުރަން ޖެހޭނެ ކަމަށް ގަވަރުނަރު ވިދާޅުވިއެވެ.
