މިދިޔަ ޖުލައި މަހު މާޒިޔާގެ ކޯޗުކަމާ ހަވާލުވި ރާއްޖޭގެ މަޝްހޫރު ކޯޗު މުހައްމަދު ނިޒާމް (ނިޒާމްބެ) ދިވެހި ޕްރިމިއާ ލީގުގެ އެންމެ ތިން މެޗަށް ފަހު މާޒިޔާގެ ކޯޗުކަން ދޫކޮށްލައިފިއެވެ.
ލީގުގައި ހުރާހާ މެޗެއް ކާމިޔާބުކޮށް ސައްތައިގެ ރެކޯޑު ހެދުމުގެ ފުރުސަތު މާޒިޔާ ގެއްލުނުތާ 24 ގަޑި އިރުނުވަނީސް ނިޒާމް މާޒިޔާއިން އިސްތިއުފާ ދިން އިރު ނިއުރޭޑިއަންޓުން ވަނީ 2013 ވަނަ އަހަރުގެ ލީގު ހުރިހާ މެޗެއް ކާމިޔާބުކޮށް ސައްތައިގެ ރެކޯޑަކާއެކު ލީގުގެ ތަށި އުފުލާލާފައެވެ.
ނިޒާމްބެ މާޒިޔާ ދޫކޮށްލިކަން ހާމަކުރީ ދެންމެ ސޯޝަލް މީޑިއާގައި ކުރި ޕޯސްޓެއްގައެވެ. ޖުލައި 21 ވަނަ ދުވަހު މާޒިޔާގެ ކޯޗުކަމާ ހަވާލުވެ މިހާތަނަށް މާޒިޔާ ޓީމުގައި ނިޒާމްބެ އިރުޝާދުދިނީ ހަތަރު މެޗުގަ އެވެ. އޭގެތެރެއިން ދެ މެޗުން މޮޅުވެ އެއް މެޗު އެއްވަރުވެ އެފްއޭ ޗެރިޓީ ޝީލްޑް މެޗުން ވަނީ ބަލިވެފަ އެވެ.
އަނެއްކާވެސް އަހަރެންގެ ކެރިއާގެ ބޮޑު ނިންމުމެއް. ރޭގެ މެޗުގައި ޓީމުގެ ފަރާތުން ފެނުނު ދަށް ކުޅުމާ އެކު މާޒިޔާގެ ހެޑް ކޯޗުކަމުން އިސްތިއުފާދޭން އަހަރެން ނިންމައިފިން. ކްލަބްގައި ހޭދަކުރި ދުވަސްތަކުގައި މެނޭޖްމަންޓާއި ކުޅުންތެރިންގެ ފަރާތުން ލިބުނު އެއްބާރުލުމަށް ވަރަށް ބޮޑަށް ޝުކުރު އަދާކުރަން ބޭނުން. އަހަރެން ކުރިއަށް މި އޮތް ދިގު ސީޒަނުގައި މާޒިޔާ އަށް ކާމިޔާބަށް އެދެން.
– ނިޒާމްބެ ސޯޝަލް މީޑިއާގައި ކުރި ޕޯސްޓުގައި ބުނެފައިވެއެވެ.
އެފްއޭ ޗެރިޓީ ޝީލްޑް މެޗުގައި ކްލަބް އީގަލްސް އަތުން ބަލިވީ މާޒިޔާގެ ދެ ގޯލުގެ ލީޑެއްގައި އޮއްވަ އެވެ. އޭގެފަހުން ލީގުގައި ކުޅުނު ފުރަތަމަ މެޗުގައި ޔުނައިޓެޑް ވިކްޓްރީ އަތުން 4-0 އިން މޮޅުވި އިރު ދެ ވަނަ މެޗުގައި މާޒިޔާ އިން ވަނީ ކްލަބް ގްރީން ސްޓްރީޓްސް 7-1 އިން ބަލިކޮށްފަ އެވެ. އެކަމަކު ރޭ ކްލަބް ވެލެންސިއާއާ ދެކޮޅަށް ކުޅޭ މާޒިޔާ 0-0 އިން އެއްވަރުވި މެޗަށް ފަހު ނިޒާމްބެ ބުނީ އޭނާގެ ޓީމުން ކުޅުނީ ބޭނުންވި ފުޓްބޯޅަ ނޫންކަމަށެވެ.
ކޮމެންޓު ފޮނުވާ