ޗައިނާ އަދި އިންޑިއާގެ ސަފީރުންނާއި ވަކިވަކިން، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަޙްމަދު މުނައްވަރާ ބައްދަލުކޮށް، ރާއްޖެއާއެކު މާލީ ގުޅުން ވަރުގަދަކުރުމާ ބެހޭގޮތުން މަޝްވަރާކޮށްފިއެވެ.
އެމްއެމްއޭއިން މައުލޫމާތު ދީފައިވާ ގޮތުގައި، ޗައިނާގެ ސަފީރު ވަންގް ލިޝިން އަދި އިންޑިއާގެ ސަފީރު މުންނޫ މަހާވަރު ވަނީ ގަވަރުނަރު އަޙްމަދު މުނައްވަރަށް އިހުތިރާމުގެ ޒިޔާރަތެއް ކޮށްފައެވެ. މި ބައްދަލުވުންތަކުގައި ދެ ޤައުމުންވެސް ރާއްޖެއާއެކު އިޤްތިޞާދީ އަދި މާލީ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެވުނެވެ.
އިންޑިއާ އަދި ޗައިނާގެ ސަފީރު އެމްއެމްއޭގެ ގަވަރުނަރާ ބައްދަލު ކުރައްވާފައިވާއިރު، މި ދެގައުމަކީ ރާއްޖެއިން އެންމެ ބޮޑެތި ލޯނު ނަގާފައިވާ ދެގައުމެވެ. އެގޮތުން ޗައިނާއިން ރާއްޖޭގައި، ރައީސް ޔާމިންގެ ދައުރުގައި މެގަ ޕްރޮޖެކްޓްތައް ހިންގާފައިވާއިރު، އިންޑިއާއިން އަދިވެސް ދަނީ، ރައީސް ސާލިހުގެ ދައުރުގައި ފެށި ބޮޑެތި ޕްރޮޖެކްޓްތައް ކުރިޔަށް ގެންދަމުންނެވެ.
އަޙްމަދު މުނައްވަރު ގަވަރުނަރުގެ މަޤާމަށް އައްޔަންކުރެވުނީ ފާއިތުވި މަހުގެ ތެރޭގައެވެ. އޭގެ ކުރިން، 2023 ގެ ޑިސެންބަރު 12 އިން 2024 ގެ ޖުލައި 22 އާ ހަމައަށް އޭނާ ހުންނެވީ މިނިސްޓްރީ އޮފް ފިނޭންސްގެ އެޑްވައިޒަރ ޓު ދަ މިނިސްޓަރ އޮފް ފިނޭންސްގެ މަޤާމުގައެވެ. މީގެ އިތުރުން، އޭނާ ވަނީ ކުރިން މިނިސްޓަރ އޮފް ފިނޭންސް އެންޑް ޓްރެޜަރީގެ މަޤާމުވެސް ފުރުއްވާފައެވެ.
