ދައުލަތަށް އާމްދަނީ އިތުރުކުރުމަށް ޓެކްސް ބޮޑުކުރުމުގެ ވިސްނުން ސަރުކަރުން ނުގެންގުޅޭ ކަމުގައި މާލީ ވަޒީރު މުހައްމަދު ޝަފީގު ވިދާޅުވެއްޖެއެވެ.
ޝަފީގު މިހެން ވިދާޅުވީ ރައްޔިތުންގެ މަޖިލިހުގެ މާލިއްޔަތު ކޮމިޓީގައި ވާހަކަ ދައްކަވަމުންނެވެ.
މާލިއްޔަތު ކޮމިޓީގައި ވާހަކަ ދައްކަވަމުން ޝަފީގު ވިދާޅުވީ، ރައްޔިތުންނަށް ބުރަ ބޮޑުވާގޮތަށް އެއްވެސް ޓެކްސްއެއް ބޮޑުކުރުމުގެ ވިސްނުން ސަރުކާރުން ގެންގުޅެމުން ނުދާކަމުގައެވެ. އެގޮތުން ޖީއެސްޓީ، ޓީޖީއެސްޓީ، ވިތުހޯލްޑިން ޓެކްސް، އަދި ބީޕީޓީވެސް ބޮޑުކުރުމުގެ ވިސްނުމެއް ސަރުކާރުން ގެންގުޅެމުން ނުދާކަމުގައި އޭނާ ވިދާޅުވިއެވެ.
ސަރުކާރުން ބޭނުންވަނީ.. އެނގިވަޑައިގަންނަވާނެ 2023ވަނަ އަހަރުގެ ޖެނުއަރީން ފެށިގެން މިއިންނަނީ ޓެކްސް ރޭޓްތަކެއް ބޮޑު ކުރެވިފަ. އޭގެ ބަދަލުގައި ބޭސް ފުޅާކޮށް، ދައުލަތަށް ލިބެންޖެހޭ އާމްދަނީ ވީހާވެސް ބޮޑުކޮށް ލިބޭ ގޮތަކަށް. އެކަމަކު އޭގެ އިތުރަށް ބައެއް ފީތަކުގެ ވާހަކަ އަޅުގަޑުމެން މިދައްކަނީ އެއީ 2026 ވަނަ އަހަރު ދައްކަންޖެހިފަ އޮތް ބޮޑެތި ދަރަނިތަކެއް އެބަހުރި. އެދަރަނި ތަކަކީ ޑޮލަރުން ދައްކަންޖެހޭ ދަރަނިތަކެއް. އެހެންވީމަ އެއަށް ބޭނުންވާ ބަފައެއް، ސޮވެރިން ޑިވެލޮޕްމަންޓް ފަންޑު ބިލްޑު ކުރެވޭ ގޮތަށް، އެ އަމާޒުގަ މަސައްކަތް ކުރުމަކީ ކޮންމެ ދިވެހި ރައްޔިތަކުވެސް ބޭނުންވާނެ ކަމެއް. އެކަންތައް ހާސިލް ކުރެވެން މި އަންނަނީ، އޭގެ އެންމެ މުހިންމު ކަމަކީ ސޮވެރިން ޑިވެލޮޕްމަންޓް ފަންޑަށް ޖަމާކުރެވޭ އަދަދު އިތުރުކުރުން.
ޝަފީގު ވިދާޅުވިއެވެ.
ޝަފީގު އިތުރަށް ވިދާޅުވީ ދަރަނީގެ އިތުރަށް ތެލުގެ ބިލްތައް ދެއްކުމަށް ކޮންމެ ހަފްތާއަކުވެސް އެވްރެޖްކޮށް 100 މިލިއަން ރުފިޔާ ހޭދަކުރަން ޖެހޭކަމަށާއި، އެއީ ޑޮލަރުން ދައްކަންޖެހޭ ފައިސާ ކަމުގައެވެ. އޭނާ ވިދާޅުވީ އޭގެ އިތުރަށް މެޑިކަލްއަށްވެސް ބޭރުފައިސާގެ ބޮޑެތި އަދަތުތަކުން ދައްކަންޖެހޭ ކަމަށާއި، އެކަމަށް ބޭރު ފައިސާ ހޯދަންޖެހޭތީ ފީތައް ބޮޑުކުރެވިގެންދާނީ އެ އަމާޒަށް ވާސިލް ވެވޭ ގޮތަށް ކަމުގައެވެ.
