ޔުނައިޓެޑާއި ޓޮޓްނަމް ސެމީފައިނަލަށް

އިނގިރޭސި ލީގުކަޕް ސެމީފައިނަލަށް މެންޗެސްޓަރ ޔުނައިޓެޑާއި ޓޮޓްނަމް ދަތުރުކޮށްފިއެވެ.

ޔުނައިޓެޑު މުބާރާތުގެ ސެމީފައިނަލުން ޖާގަހޯދީ ރަށުންބޭރުގައި އެވަޓަން ދެކޮޅަށް ކުޅުނު މެޗު 2-0 ލަނޑުން ކާމިޔާބުކޮށްގެންނެވެ. މެޗުގެ ފަހު ކޮޅު ލަނޑުތައް ފެނިގެން ދިޔައިރު ފުރަތަމަ ލަނޑު މެޗުނިމެން 2 މިނެޓަށް ވެފައިވަނިކޮށް ކާމިޔާބުކުރީ އެޑަންސަން ކަވާނީއެވެ. މިއީ އޭނާ މި ސީޒަންގައި ޔުނައިޓެޑަށް ކާމިޔާބުކޮއްދިން ހަތަރުވަނަ ލަނޑެވެ.

އަދި އެވަޓަންއާ ދެކޮޅަށް މި ސީޒަންގައި އޭނާ ކާމިޔާބުކުރި ދެވަނަ ލަނޑެވެ. ޔުނައިޓެޑުން ޖެހި ދެވަނަ ލަނޑު ކާމިޔާބުކުރީ މެޗުގެ އިތުރުވަގުތުގެ ފަހުމިނުޓުގައި އެންޓާނީ މާޝިއަލްއެވެ. މިއީ މުބާރާތުގެ ސެމީ ފައިނަލުން ޔުނައިޓެޑު ޖާގަހޯދި 16 ވަނަފަހަރުއެވެ. މިއީ އިނގިރޭސިވިލާތުގެ ކުޅޭ މުބާރާތް ތަކުން ޔުނައިޓެޑުން ވިދިވިދިގެން ރަށުން ބޭރުގައި ހޯދި 14ވަނަ މޮޅެވެ.

މުބާރާތުގެ ސިމީ ފައިނަލުގެ ފަހު ޖާގަ ޓޮޓްނަމްއިން ރޭ ކަށަވަރުކުރީ ސްޓޯކް ސިޓީ ބަލިކޮށްގެންނެވެ. ރަށުން ބޭރުގައި ކުޅުނު މެޗު ޓޮޓްނަމުން ކާމިޔާބުކުރީ 3-1 ލަނޑުންނެވެ. މެޗުގެ ފުރަތަމަ ހާފްގައި ޓޮޓްނަމްގެ ގެރެތް ބޭލް ލަނޑެއް ޖަހާފަވަނިކޮށް ދެވަނަހާފުގެ ކުރީކޮޅު ސްޓޯކްއިން އެއްވަރުކުރީ ޖޯޑަން ތޮމްޕްސަންއެވެ. ޓޮޓްނަމް މިހާފްގައި ދެވަނަ ފަހަރަށް ކުރި ހޯދައިދިނީ ބެން ޑޭވިސްއެވެ.

ޓޮޓްނަމް އިތުރަށް ލީޑް ފުޅާކޮއްދިނީ ހެރީކޭންއެވެ. ލީގުގައި ކަޕުގައި އެންމެފަހުން ބޭލް ކުޅުނު 8 މެޗުގައިވެސް އޭނާ ވަނީ ލަނޑުޖަހާފައެވެ. އޭނާ އެންމެފަހުން އިނގިރޭސި ލީގުކަޕުގައި ލަނޑުޖެހީ 2012ވަނަ އަހަރު ނޯވިޗް ސިޓީ ދެކޮޅަށެވެ. މި ސީޒަންގައި ޓޮޓްނަމް އަށް އެނބުރި އައުމަށްފަހު ބޭލްވަނީ ތަފާތު ތިން މުބާރާތެއްގައި ޓޮޓްނަމް އަށް ލަނޑުޖަހައިދީފައެވެ. ރޭގެ މެޗުގައި ފަހު ލަނޑުޖެހި ހެރީ ކީން ވަނީ އެންމެފަހުން ސްޓޯކް ސިޓީއާ ދެކޮޅަށް ކުޅުނު 11 މެޗުގައި 10 ލަނޑުޖަހާފައެވެ. އެންމެފަހުން ސްޓޯކް ސިޓީއާ ދެކޮޅަށް ކުޅުނު 5 މެޗުވެސް ޓޮޓްނަމުން ވަނީ ކާމިޔާބުކޮށްފައެވެ.