ޕެލޭގެ ރެކޯޑް މެސީ މުގުރާލައިފި

އެއް ކްލަބަކަށް އެންމެ ގިނަ ގޯލް ޖަހައިގެން ބްރެޒިލްގެ ލެޖެންޑްރީ ފޯވާޑް ޕެލޭ ހަދާފައިވާ ރެކޯޑް ބާސެލޯނާގެ ލިއޮނަލް މެސީ މުގުރާލައިފި އެވެ.

ބްރެޒިލްގެ ސަންތޯސް އަށް 1956-1974 އަށް 656 މެޗުން 643 ގޯލް ޖަހައިގެން ޕެލޭ ހެދި ރެކޯޑް މެސީ މުގުރާލީ ސްޕެނިޝް ލީގުގައި ރޭ ރެއާލް ވަޔަޑޮލިޑް އަތުން 3-0 އިން މޮޅުވި މެޗުގައި ޖެހި ލަނޑާ އެކު، 749 މެޗުން 644 ލަނޑު ހަމަކޮށްގެންނެވެ. ޕެލޭގެ ރެކޯޑާ މެސީ ހަމަކުރީ މިދިޔަ ހޮނިހިރު ދުވަހު އެވެ.

ބާސެލޯނާގެ ޔޫތު ޓީމާ 2001 ވަނަ އަހަރު ގުޅުނު މެސީ ސީނިއާ ޓީމަށް ކުޅެން ފެށީ 2004 ގަ އެވެ. އެ ޓީމާ އެކު ސްޕެނިޝް ލީގު 10 ފަހަރު، ޗެމްޕިއަންސް ލީގު ހަތަރު ފަހަރު އަދި ސްޕެނިޝް ކަޕް ހަ ފަހަރު އޭނާ ކާމިޔާބުކުރި އެވެ.

މެސީ ބާސެލޯނާ އަށް ފުރަތަމަ ލަނޑު ކާމިޔާބުކޮށްދިނީ 2005 ވަނަ އަހަރު އެވެ.