އިންޑިއާގެ އާންމު އިންތިޚާބުގައި އެގައުމުގެ މިހާރުގެވެސް ބޮޑުވަޒީރު ނަރެންދުރަ މޯދީ ހޯއްދެވި ކާމިޔާބީއަށް ކުރީގެ ރައީސް ސާލިހު މަރުހަބާ ވިދާޅުވެއްޖެއެވެ.
މޯދީއަށް މަރުހަބާ ވިދާޅުވެ ރައީސް ސާލިހު ކުރެއްވި އެކްސް ޕޯސްޓުގައި ވިދާޅުވީ ބޮޑުވަޒީރު މޯދީގެ ބީޖޭޕީ އާއި ނޭޝަނަލް ޑިމޮކްރެޓިކް އެލަޔަންސް އިން އިންޑިއާގައި ބޭއްވި އާންމު އިންތިހާބުގެ ކާމިޔާބީއާ ގުޅިގެން މަރުހަބާ ދަންނަވާ ކަމަށާއި، އިންޑިޔާގެ ޑިމޮކްރަސީ ވަރުގަދަކޮށް ދެމެހެެއްޓުމަށް އެގައުމުގެ ރައްޔިތުން ކުރަމުންދާ މަސައްކަތްތަކަށް އިންޑިއާގެ ރައްޔިތުންނަށްވެސް މަރުޙަބާ ދަންނަވާ ކަމުގައެވެ.
އަދި ރަހުމަތްތެރޮއަކާ އަވަށްޓެރިއެއްގެ ހައިސިއްޔަތުން، އިންޑިޔާގެ ޑިމޮކްރަސީ އެންމެ ހަރުދަނާ ބިންގަލުގެ މަތީގައި ބިނާވެފައި އޮތުމަކީ އުފާކުރާކަމެއްކަމަށްވެސް ރައީސް ސާލިހު ވިދާޅުވެފައި ވެއެވެ.
އިންޑިއާގައި ބޭއްވުނު އާންމު އިންތިޚާބު ބީޖޭޕީ ކޯލިޝަނުން ކާމިޔާބު ކުރިއިރު އެޕާޓީއަށް ކާމިޔާބު ކުރެވުނީ 240 ގޮނޑިއެވެ. މިއީ 2019 ވަނަ އަހަރު އެޕާޓީން ކާމިިޔާބު ކުރި 303 ގޮނޑިއަށްވުރެ ވަރަށްވެސް ދަށް ނަތީޖާއެކެވެ.
އެހެންކަމުން، ބީޖޭޕީއަށް އެކަނި ސަރުކާރެއް އުފެއްދޭވަރުގެ ކާމިޔާބީއެއް މިއިންތިޚާބުގައި ހޯދިފައެއް ނުވެއެވެ. އެއްވެސް އަމިއްލަ ޕާޓީއަކަށް ސަރުކާރެއް އުފެެއްދެނީ 543 ގޮނޑި ހިމެނޭ ގާނޫނުހަދާ މަޖިލުހެ 272 ގޮނޑި ލިބިގެންނެވެ. އެހެންނަމަވެސް ބީޖޭޕީގެ ކޯލިޝަނަށް ޖުމްލަ 293 ގޮނޑި ކާމިޔާބު ކުރެވިފައި ވެއެވެ.
އެހެންކަމުން ބީޖޭޕީ ކޯލިޝަނަށް ސަރުކާރު އުފެއްދުމުގެ ޖާގަވަނީ ލިބިގެން ގޮސްފައެވެ.
މިއިންތިޚާބު ވެގެންދިޔައީ ފާއިތުވި 10 އަހަރުތެރޭގައިވެސް ގާނޫނުހަދާ މަޖިލިހުގައި ބީޖޭޕީއަށް އޮތް މެޖޯރިޓީ ގެއްލިގެންދިޔަ ފުރަތަމަ ފަހަރެވެ.
މި އިންތިޚާބުގައި އިދިކޮޅު ކޮންގްރެސް ޕާޓީ މައި ޕާޓީއެއްގެ ގޮތުގައި އޮތް ކޯލިޝަނުންވަނީ 232 ގޮނޑި ކާމިޔާބު ކޮށްފައެވެ. އެހެން ޕާޓީތަކަށް ކާމިޔާބު ކުރެވިފައިވަނީ 18 ގޮނޑިއެވެ.
