20 ވަނަ ރައްޔިތުންގެ މަޖިލިހުގައި، ސުޕަރ މެޖޯރިޓީ ކަށަވަރު ކުރި ވެރިކަން ކުރާ ޕީއެންސީގެ ޕީޖީ ގުރޫޕްގެ ލީޑަރަކަށް އިނގުރައިދޫ ދާއިރާއަށް އިންތިޚާބު ވެޑައިގެންނެވި މުހައްމަދު ފަލާހް ހަމަޖެއްސުމަށް ނިންމައިފި އެވެ.
މިއަދު މުލިއާގޭގައި، 20ވަނަ މަޖިލީހަށް އަލަށް އިންތިޚަބުވީ މެމްބަރުންމާއި، ވަޒީރުންނާއި ކުންފުނިތަކުގެ އެމްޑީންނާއި ޕީއެންސީ އަދި ޕީޕީއެމްގެ އިސްވެރިންނާއެކު ބޭއްވުނު ބައްދަލުވުމުގައި މަޖިލިސް ރައީސްކަމަށާއި، ނައިބު ރައީސްކަމަށް އަދި ޕާލަމެމްޓްރީ ގުރޫޕުގެ ލީޑަރުކަމަށްވެސް ނަން ހުށަހެޅުއްވީ ރައީސް މުއިއްޒުއެވެ.
މިއަދުގެ ބައްދަލުވުމުގައި ޕީއެންސީގެ ޕީޖީ ލީޑަރުކަމަށް ފަލާހު އައްޔަން ކުރަން ހަމަޖެއްސިއިރު، ފަލާހުވަނީ 18ވަނަ ރައްޔިތުންގެ މަޖިލިހުގެ މެމްބަރުކަންވެސް ކުރައްވާފައެވެ. އަދި އޭނާއަކީ ޕީޕީއެމްގަވެސް އަދި ފަހުން ޕީއެންސީގަވެސް އިސްކޮށް މަސައްކަތް ކުރައްވާފައިވާ ފަރާތެކެވެ.
ފަލާހު 20 ވަނަ ރައްޔިތުންގެ މަޖިލިހުގެ އިނގުރައިދޫ ދާއިރާއަށް އިންތިޚާބުވީ މުޅިރާއްޖެއިން އެންމެ ގިނައިން ވޯޓު ހޯދި 10 މެމްބަރުންގެ ތެރޭގައި ހިމެނިގެންނެވެ.
މިއަދު މުލިއާގޭގައި ބޭއްވުނު ބައްދަލުވުމުގައި ވަނީ ޕީއެންސީގެ ޕީޖީ ގްރޫޕްގެ ނައިބު ލީޑަރުންގެ ގޮތުގައިވެސް ބޭފުޅުން ހަމަޖައްސަން ވަނީ ނިންމާފައެވެ. އެމެމްބަރުންނަކީ ހުޅުދޫ ދާއިރާގެ އިންތިހާބީ މެންބަރު މުހައްމަދު ޝާހިދު (ޝާޑު)އާއި، ވިލިމާލެ ދާއިރާގެ އިންތިހާބީ މެންބަރު މުހައްމަދު އިސްމާއިލްއާއި މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް)އާއި ބާރަށު ދާއިރާގެ އިންތިހާބީ މެންބަރު އިބްރާހިމް ޝުޖާއުއެވެ.
މިއަދުގެ ބައްދަލުވުމުގައި ވިހިވަނަ ރައްޔިތުންގެ މަޖިލީހުގެ ރައީސް ކަމަށް ފޮނަދޫ ދާއިރާގެ އިންތިހާބީ މެންބަރު އަބްދުއްރަހީމް އަބްދުﷲ އަދި ނައިބް ރައީސް ކަމަށް ދިއްގަރު ދާއިރާގެ އިންތިހާބީ މެންބަރު އަހްމަދު ނާޒިމު އިންތިހާބު ކުރުމަށްވެސް ރައީސް ޑރ. މުހައްމަދު މުއިއްޒު ވަނީ ހުށަހަޅުއްވާފަ އެވެ.
ރައްޔިތުންގެ މަޖިލީހުގެ ރައީސް އާއި ނައިބް ރައީސް ހޮވާނީ މިމަހުގެ 28 ވަނަ ދުވަހު މެންބަރުން ހުވާކުރެއްވުމަށް ބާއްވާ ޖަލްސާގައެވެ. އެޖަލްސާގައި މަޖިލިސް ރައީސްއާއި ނައިބު ރައީސް ހޮވާނީ މެންބަރުންގެ މެދުގައި ނަގާ ސިއްރު ވޯޓަކުންނެވެ.
ކޮމެންޓު ފޮނުވާ