އީގަލްސް ރީތި ފުޓްބޯޅައެއް ކުޅެން މަސަައްކަތްކުރި ނަމަވެސް އެންމެ މުހިއްމު ކަމަކީ ނަތީޖާ ނެރުން ކަމަށާއި، ލީގަށް ވާދަކުރުމުގެ ވިސްނުމުގައި ތިބިއިރު މެޗުތަކުން މޮޅުވާން ޖެހޭކަން މުހައްމަދު ޝިޔާޒް (މޯހަން) ބުނެފިއެވެ.
ނޫސްވެރިންގެ ބައްދަލުވުމުގައި މޯހަން ބުނީ އޭނާ އަށް އޮތް އެންމެ ބޮޑު ބިރަކީ ކުޅުންތެރިންގެ މަސްގަނޑަށް ނުވަތަ ކަކުލަށް އަނިޔާއެއްލިބި ކުޅުމާ ދުރަށްދާން ޖެހިދާނެކަމުގެ ބިރު ކަމަށެވެ. އަދި އެފަދަ އަނިޔާއެއްވެއްޖެ ނަމަ ރިކަވަރީ އަށް އެންމެ ރަނގަޅަށް މަސައްކަތްކުރެވޭނެ ވަސީލަތްތައް ނެތްކަން މޯހަން ފާހަގަކުރިއެވެ.
ލީގު ކާމިޔާބުކުރުމުގެ އަޒުމުގައި އަދިވެސް މި ތިބީ. އަދި އެއްވެސް ޕްރެޝަރެއް ނެތް. އަޅުގަނޑަށް ވެސް އީގަލްސް ކުޅުންތެރިންނަށް ވެސް ނެތް ޕްރެޝަރެއް. ވަރަށް ދިގު ލީގެއް މިއީ.
– މޯހަން ބުނެފައިވެއެވެ.
ފުރަތަމަ މެޗުން ބަލިވި ނަމަވެސް އީގަލްސް އަދި ކަންބޮޑުވާންޖެހޭ ހާލަތަށް ކަންތައްތައް ނުދާ ކަމަށް މޯހަން ވަނީ ބުނެފައެވެ. މޯހަން ބުނީ އީގަލްސް ޓީސީއާ ދެކޮޅަށް ނުކުންނާނީ އެޓޭކިން ގޭމެއް ކުޅެން ކަމަށާއި އުއްމީދަކީ ޓީސީން ވެސް ފަހަތުގައި މަޑުނުކޮށް އެ ފަދަ ގޭމެއް ކުޅުން ކަމަށެވެ.
އަދިވެސް ކޮންމެ ޓީމަކަށް 20 މެޗު އެބައިން އެހެންވީމަ އެއީ ވަރަށް ގިނަ މެޗު. އުއްމީދު ކަނޑާލަން އަދި ކައިރި ވެސް ނުކުވޭ. އެކަމަކަށް ވިސްނަންދާ ހިސާބަކަށް ވެސް ނުދޭ. އަޅުގަނޑުމެން ލީގަށް ފައިޓްކުރާނަން.
– މޯހަން ބުނެފައިވެއެވެ.
މޯހަން ބުނީ އެޓީމަށް ގެންނަން ނިންމާފައިވާ ބިދޭސީ ކުޅުންތެރިން ދެ މެޗެއް ފަހުން ލިބޭނެ ކަމަށެވެ. އެހެންވެ މި މުއްދަތުގައި އެޓީމުގައި ތިބި ޒުވާން ކުޅުންތެރިން ޕްރެޝަރު މެޖޭޖް ކުރާނެކަމަށް އުއްމީދުކުރާ ކަމަށް މޯހަން ބުނެފައިވެއެވެ. އީގަލްސް އާއި ޓީސީ ކުޅޭ މެޗު ފަށާނީ މިރޭ 9 ޖަހާއިރު އެވެ.
ކޮމެންޓު ފޮނުވާ