ލީގުގަ ގަދަކަމަށް ކިޔާ ޓީމެއް އަތުން ބޮޑު މޮޅެއް ލިބުމަކީ ބޮޑު ހިތްހަމަޖެހުމެއް ކަމަށް މާޒިޔާގެ ކޯޗު މުހަންމަދު ނިޒާމް ބުނެފިއެވެ.
މެޗަށްފަހު ވާހަކަ ދައްކަމުން މާޒިޔާގެ ކޯޗު ނިޒާމް ބުނީ މި ނަތީޖާއަކީ ހިތްހަމަޖެހޭ ނަތީޖާއެއް ކަމަށާއި، ކުރީ މެޗާ އަޅާބަލާއިރު މި މެޗުން ރަނގަޅު ގިނަ ކަންތައްތަކެއް ފެނިގެންދިޔަ ކަމަށެވެ. އަދި ކުރިއަށް އޮތް ތަނުގައި ރަނގަޅުކުރަން ޖެހޭ ކަންކަންވެސް ފާހަގަވި ކަމަށްވެސް ނިޒާމްބެ ވަނި ބުނެފައެވެ. ނިޒާމް ބުނީ ލީގުގެ ގަދަކޮށް ކިޔާ ޓީމެއް އަތުން މި ވަރުގެ ބޮޑު މޮޅެއް ލިބުމަކީ ވަރަށް ބޮޑު ހިތްހަމަޖެހުމެއް ކަމަށެވެ. އަދި ދެން އޮތް އުފަލަކީ ކުރީ މެޗަށް ވުރެ ގިނައިން ގޯލު ޖަހަން ލިބުނު ފުރުސަތުތަކުގެ ބޭނުން ހިފި ކުޅުމުގެ ލެވަލް ރަނގަޅު ހިސާބެއްގައި މުޅި މެޗުގައި ހިފެހެއްޓުން ކަމަށް ނިޒާމްބެ ވަނީ ބުނެފައެވެ.
އަދިވެސް އެބަހުރި ވަރަށް ބޮޑެތި ކަންތައް ރަނގަޅުކުރަން. ކުރިއަށް އޮތް މެޗަށް ވަރަށް ރަނގަޅަށް މަސައްކަތްކުރަން މި ލިބުނީ ބޮޑު ހިތްވަރެއް.
– ނިޒާމްބެ ބުނެފައިވެއެވެ.
ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު ބުނީ ފުރަތަމަ މެޗުގައި ވެލެންސިއާ އަތުން އަދި ދެ ވަނަ މެޗުން މާޒިޔާ އަތުން ބަލިވެ ދެ ބައްޔާ އެކު ހަ ޕޮއިންޓް ގެއްލުމުގައި ސީޒަން ފަށަން ޖެހުމުން އަމާޒުހިފާނީ ވީ އެންމެ އަވަހަށް މި ހާލަތު ބަދަލުކުރަން ކަމަށެވެ. މިއީ އޭނާގެ ޓީމަށް ގަބޫލުކުރެވޭނެ ނަތީޖާއެއް ނޫން ކަމަށާއި ކުރިއަށް އޮތްތަނުގައި ވަރަށް ބޮޑަށް ރަނގަޅުކުރަން ޖެހޭ ކަމަށް ވެސް ނިސްތާރު ވަނި ބުނެފައެވެ.
މޮރޭލް ވަރަށް ބޮޑަށް ވެއްޓޭނެ މިހާ ބޮޑު ޑިފީޓެއް އައީމަ. އަޅުގަނޑުގެ ޖޮބަކަށްވާނީ އެ ނަގާ ދެން އިން މެޗަކަށް ޓީމު ތައްޔާރުކުރުން. އިރާދަކުރެއްވިއްޔާ އެކަން ކުރާނަން.
– ނިސްތާރު ބުނެފައިވެއެވެ.
މި ހޯދި ބޮޑު މޮޅާ އެކު މާޒިޔާ އޮތީ ދެ މެޗުން ވެސް މޮޅުވެ ފައިދާ ގޯލުގެ ތަފާތުން އެއް ވަނައިގައެވެ. މާޒިޔާ އަށް ހަ ޕޮއިންޓާ އެކު ފައިދާ އަށް ގޯލު އޮތްއިރު، ދެ ވަނައިގައި އޮތް ކްލަބް ވެލެންސިއާ ވެސް ވަނީ ދެ މެޗުން މޮޅުވެފައެވެ. އެ ޓީމުގެ ފައިދާ އޮތީ ފަސް ގޯލެވެ. ލީގުގައި އަންނަ ހަފްތާގެ ހޮނިހިރު ދުވަހުގެރޭ މާޒިޔާ ކުޅޭނީ ވެލެންސިއާއާ ދެކޮޅަށެވެ.
ކޮމެންޓު ފޮނުވާ