ދިވެހި ޕްރިމިއާ ލީގުގައި ޔުނައިޓެޑް ވިކްޓްރީ ކުޅުނު ދެމެޗުންވެސް ނާކާމިޔާބުވުމުގެ އެންމެ ބޮޑު މައްސަލަ އަކީ އެޓީމުގެ ސްޓްރައިކަރުގެ ގޮތުގައި ޓީމުގައި ހިމެނި ދެކުޅުންތެރިންނަށް އަނިޔާވެ ކުޅުމާއި ދުރަށް ދާން ޖެހުން ކަމަށް ޔުނައިޓެޑް ވިކްޓްރީގެ ކޯޗް މުހައްމަދު އާދަމް ބުނެފިއެެވެ.
ވެލެންސިއާ އަތުން ބަލިވި މެޗަށްފަހު ނޫސްވެރިންނާއި ވާހަކަ ދައްކަމުން ބުނީ ފަރިތަކުރުންތަކުގައި ބޭނުންކުރި ފޯވާޑަށް އަނިޔާވުމުން މި މެޗުގައިވެސް އޭނާ ބޭނުން ނުކުރެވުނު ކަމަށާއި، އެކަމުގެ ސަބަބުން އުނދަގޫތަކެއް ކުރިމަތިވި ކަމަށެވެ. އެހެންކަމުން ކުރިއަށް އޮތް މެޗުތަކުގައި ފޯމޭޝަން ބަދަލުކޮށްގެންވެސް ނަތީޖާ ނެރެން މަސައްކަތްކުރާނެ ކަމަށްވެސް އޭނާ ބުނެފައިވެއެވެ.
މުބާރާތުގައި އަހަރެމެން ކިރިޔާވެސް ކާމިޔާބެއް ހޯދަން ބޭނުމިއްޔާ އަހެރެމެން ކުޅޭ ފޯމޭޝަން އެބަ ޖެހޭ ބަދަލު ކުރަން. މީގެ ކުރީގަ އަހަރެމެން ބަލަމުން އައީ ޕާސިން ގޭމެއް ކުޅެވޭތޯ. ދެން އެއީ އަހަރެމެންގެ ތިބި ކުޅުންތެރިންނަށް ބަލާފަ އަހަރެމެންގެ ހުރި ރަނގަޅު ސްޓްރައިކަރެއް.
– މުހައްމަދު ބުނެފައިވެއެވެ.
ކޯޗް މުހައްމަދު ބުނީ އުންމީދު ކުރީ މެޗުގައި އެޓީމުގެ ބޭރު ސްޓްރައިކަރަށް ކުޅެވޭނެ ކަމަށާއި ނަމަވެސް އިއްޔެގެ މެޗަށްވެސް އޭނާ ފިޓް ނުވުމުގެ ސަބަބުން ކުޅެންޖެހުނީ މިޑްފީލްޑަށް ނޫނީ އަރިމައްޗަށް ކުޅޭ ކުޅުންތެރިއެއް ކުރިއަށް ލައިގެން ކަމަށެވެ. ކޯޗް ބުނީ މިހާރު ޓީމު އޮތީ ނުބައި ފައްތަރެއްގައި ކަމަށެވެ. މުހައްމަދު ބުނީ ޓީމުގެ ޑިފެންސް ލައިނާއި މެދު ވަރަށް ކަންބޮޑުވާކަމަށާއި މިހާރު ބޭނުން ކުރަމުން ދަނީ ފައިނަލް ޑިފެންސްލައިނެއް ނޫންކަމަށެވެ. ނަމަވެސް ދެން އަންނަ މެޗަށް ނިކުންނާނީ ވަރުގަދަ ޑިފެންސްލައިނަކާއި އެކު ކަމަށް ޔޫވީގެ ކޯޗު ބުނެފައިވެއެވެ.
ލީގުގައި މިހާރު ދެ މެޗް ޔޫވީން ކުޅެފައިވާއިރު އެޓީމުކޮޅަށްވަނީ 8 ގޯލު ވަދެފައެވެ.
ކޮމެންޓު ފޮނުވާ