ދިވެހިރާއްޖޭގެ ރިސޯޓުތަކުގައި ވަޒީފާ އަދާކުރާ ދިވެހިންނަށް ތުނބުޅި ބެހެއްޓޭގޮތް ހަދާދިނުމަށް މިއަދު ބޭއްވުނު މަސައްކަތްތެރިންގެ މުޒާހިރާގައި ގޮވާލައިފިއެވެ.
މިއަދުގެ ރެލީގައި އަޑުއުފުލާފައިވަނީ، ރިސޯޓުގައި އަދާކުރާ މުވައްޒަފުންނަށް ތުނބުޅި ބެހެއްޓުމުގެ ހުއްދަ ދޭންޖެހޭ ކަމަށާއި، މުވައްޒަފުންގެ ވަޒީފާ ގެއްލިގެން ނުދާނެކަމުގެ ޔަގީންކަން އޮންނަން ޖެހޭނެކަމުގައެވެ. އަދި ރިސޯޓުތަކުގައި ވަޒީފާ އަދާކުރާ ދިވެހިންގެ ނިސްބަތް %50 އަށް ބަދަލުކުރުމަށްވެސް މިއަދުގެ ރެލީގައިވަނީ އަޑުއުފުލާފައިވެއެވެ.
މިއަދު ކުރިޔަށްދިޔަ މަސައްކަތްތެރިންގެ މުޒާހިރާ އިންތިޒާމް ކޮށްފައިވަނީ އިންތިޒާމްކުރާ މޯލްޑިވްސް ޓްރޭޑް ޔޫނިއަން ޗެމްބާސްއިންނެވެ. މި މުޒާހިރާގައި މޯލްޑިވްސް ޓްރޭޑް އެސޯސިއޭޝަން (އެމްޓީއޭ)ގެ އިތުރުން މަސައްކަތްތެރިންގެ ޔޫނިއަންތަކާއި މަސައްކަތްތެރިންވެސް ވަނީ ބައިވެރި ވެފައެވެ.
މިއަދު 3:45ގައި ރަސްފަންނުން ފެށުނު ރެލީ މަޖީދީމަގުން ހިނގާލާފަ ގޮސް ނިންމާލީ އާރޓިފިޝަލް ބީޗުންނެވެ. އާރޓިފިޝަލް ބީޗުގައި މި ރެލީގައި ބައިވެރިވި އިސް ފަރާތްތަކުންވަނީ ވާހަކަ ދައްކާފައެވެ.
މިއަދުގެ ރެލީގައިވަނީ މަސައްކަތް ކުރަންޖެހޭ ވަގުތު 6 ގަޑިއިރަށް ބަދަލު ކޮށްދިނުމަށާއި، މަސައްކަތްތެރިންގެ މެދުގައި އޮތް ތަފާތުކުރުން ނައްތާލުމަށްވެސް އަޑު އުފުލާފައެވެ. އޭގެ އިތުރުން ބިދޭސީންވެސް މިނިމަމް ވޭޖުގައި ހިމަނާ ބިދޭސީ މަސައްކަތްތެރިންގެ މެދުގައި އޮތް ތަފާތުކުރުންތައްވެސް ނައްތާލުމަށްވަނީ މިއަދުގެ ރެލީގައި އަޑު އުފުލާފައެވެ. އަދި އޭގެއިތުރުން ސިވިލްސާވިސް މުވައްޒަފުންނަށް ކަނޑައަޅާފައޮތް އޯޓީ ސީލިންވެސް ނައްތާލުމަށްވެސް ރެލީގައި ގޮވާލާފައި ވެއެވެ.
މިއަދަކީ ބައިނަލްއަގުވާމީގޮތުން ފާހަގަ ކުރަމުންދާ މަސައްކަތްތެރިންގެ ދުވަހެވެ. ބައިނަލްއަގުވާމީގޮތުން, މަސައްކަތުގެ މާހައުލުގެ ސަލާމަތާއި ސިއްޙީ ރައްކާތެރިކަމުގެ ދުވަހެއް ފާހަގަ ކުރުމުގެ މަގްސަދަކީ, ގައުމެއްގެ ކުރިއެރުމުގައި މަސައްކަތްތެރިން ދައުރާއި, ވާ މަތިވެރި ގުރުބާނީތަކުގެ އަގުވަޒަންކޮށް, މަސައްކަތްތެރިންގެ ހަގުތަކަށް ވާ އަދި ވެވޭ އިހުމާލު ވަޒީފާ ދޭ ފަރާތްތަކާއި ސަރުކާރުތަކުގެ ސަމާލުކަމަށް ގެނައުމެވެ. މަސައްކަތްތެރިންގެ ހައްގުގައި އެދުވަހު އަޑު އުފުލުމެވެ.
ކޮމެންޓު ފޮނުވާ