އިދިކޮޅު އެމްޑީޕީގެ ގައުމީ މަޖިލީހުގެ ޖަލްސާއެއް މިރޭ ބޭއްވުމަށް އެ ޕާޓިން ނިންމައިފިއެވެ.
އެމްޑީޕީން ހާމަކުރި ގޮތުގައި އެޕާޓީގެ ގައުމީ ޖަލްސާ މިރޭ 8:30 ގައި އެ ޕާޓީގެ މައި އޮފީހުގައި އޮންނާނެއެވެ. މި ޖަލްސާގެ އެޖެންޑާ އަދި ހާމަކޮށްފައެއްނުވެއެވެ.
މިއީ މަޖިލިސް އިންތިހާބުގައި ލިބުނު ބޮޑު ނާކާމިޔާބީއަށް ފަހު އެޕާޓިން ބާއްވާ ގައުމީ މަޖިލީހުގެ ފުރަތަމަ ޖަލްސާއެވެ.
އެމްޑީޕީން މިރޭ ބާއްވާ ޖަލްސާގައި އެ ޕާޓީއަށް ލިބުނު ބޮޑު ނާކާމީޔާބީއާ ގުޅިގެން މަޝްވަރާކޮށް ޕާޓީގެ އެތެރޭގެ މަޝްވަރާތައް ކުރާނެ ކަމަށް މައުލޫމާތު ލިބެއެވެ. އެގޮތުން އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެ ޕާޓީއަށް ލިބުނީ އެންމެ 12 ގޮނޑިއެވެ.
މަޖިލިސް އިންތިހާބުގައި ސަރުކާރަށް ސުޕަ މެޖޯރިޓީ ލިބިފައިވާއިރު އަމިއްލަގޮތުން ވާދަކޮށް އިންތިހާބު ކާމިޔާބު ކުރެއްވި ގިނަ މެމްބަރުންވެސް ވަނީ ސަރުކާރާ ގުޅިވަޑައިގެންފައެވެ.
ކޮމެންޓު ފޮނުވާ