އަލުން ބަޔާން އެއްވަނައަށް

ޖަރުމަނު ބުންޑަސްލީގާގައި ތާވަލުގެ ކުރީގައި އޮތް ބަޔާ ލެވަކޫސަން ބަލިކޮށް ބަޔާން މިއުނިކުން އަލުން ތާވަލުގެ އެއްވަނައަށް ޖެހިލައިފިއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ 2-1 ލަނޑުންނެވެ. މެޗު ފުރަތަމަ ލަނޑުޖަހައި ކުރިހޯދީ ލެވަކޫސަންއިންނެވެ. ލަވަކޫސަންއަށް މިލަނޑު ކާމިޔާބުކޮއްދިނީ ޕެޓްރިކް ޗިކްއެވެ. ބަޔާންއިން ނަތީޖާ ހަމަހަމަކޮށްދިނީ ފީފާގެ އަހަރުގެ އެންމެ މޮޅު ކުޅުންތެރިޔާގެ އެވޯޑް ހޯދި ރޮބާޓް ލެވޮންޑެސްކީއެވެ.

މެޗުން ބަޔާން މޮޅުވި ލަނޑު މެޗުގެ އިތުރުވަގުތުގެ އެންމެ ފަހު މިނިޓުގައި ލެވޮންޑެސްކީ ކާމިޔާބުކޮށްދިން އިރު މިއީ އޭނާ ބުންޑަސްލިގާގައި ޖެހި 253 ވަނަ ލަނޑުއެވެ. މި ދެލަނޑާއެކު އޭނާ މިއަހަރު ނިންމާލީ 44 މެޗުން 47 ލަނޑު ކާމިޔާބުކޮށްގެންނެވެ.

ރޭ މި ލީގުގައި ކުޅުނު އެހެން މެޗުތަކަށް ބަލާއިރު ލީޕްޒިގް ކުލޯން މެޗު ލަނޑެއް ނުޖެހި އެއްވަރުވިއިރު ހޮފެންހަމް ވަނީ 2-1 ލަނޑުން މޮންޗެންގްލެބެކް ބަލިކޮށްފައެވެ. ވާޑްބްރޭމަން މެއިންޒް އަތުން 1-0 ލަނޑުން މޮޅުވިއިރު ހަމަ މިނަތީޖާ އިން އިރްމީނިއާ ބެއިލަފީލްޑް ވަނީ ޝާލްކޭ އަތުން މޮޅުވެފައެވެ. އެންޓްރިޗް ފްރޭންކްފާޓް ވަނީ އޮގްސްބާގް އަތުން 2-0 ލަނޑުން މޮޅުވެފައެވެ.

މި ނަތީޖާއެކު ބަޔާން ތާވަލުގެ އެއްވަނައިގަ އޮތީ 13 މެޗުން 30 ޕޮއިންޓް ހޯދައިގެންނެވެ. ލެވަކޫސަން ދެ ޕޮއިންޓް މަދުން ދެވަނާއިގަ 28 ޕޮއިންޓާއެކު އޮތްއިރު ލީޕްޒީގް ތިންވަނައިގަ އޮތީ ހަމަ އެއަދަށް ޕޮއިންޓް ހޯދައިގެން ލަނޑުގެ ތަފާތުންނެވެ. ޑޯޓްމަންޑް ހަތަރުވަނައިގަ އޮތީ 22 ޕޮއިންޓާއެކުއެވެ.