ވެލެންސިޔާ އަކީ ވަކި މީހަކަށް ހާއްސަކޮށްފައިވާ ޓީމެއް ނޫންކަމަށް ކޯޗު މުހައްމަދު އާތިފް (އާތީ) ބުނެފިއެވެ.
ވެލެންސިއާ ބެންޗުގައި ތިބި ކުޅުންތެރިންނަކީ ވެސް ފުރަތަމަ އެގާރައިގައި ކުޅެވޭނެ ފެންވަރުގެ ކުޅުންތެރިންކަން ފާހަގަކޮށް އާތީ ބުނީ ޕްރެކްޓިހުގައި ރަނގަޅަށް މަސައްކަތްކުރާ ކުޅުންތެރިން ޓީމުގައި ހިމެނޭނެ ކަމަށެވެ. ހަތަރު ދުވަހުން ނޫނީ ފަސް ދުވަހުން މެޗެއް ކުޅެން ޖެހޭއިރު ވެލެންސިއާގެ ނަތީޖާތަކާއި ހާލަތަށް ބެލުމަށް ފަހު މެޗުތަކަށް ނެރޭ ފުރަތަމަ އެގާރަ އަށް ބަދަލުތަކެއް އަތުވެދާނެ ކަމަށް އާތީ ބުނިއެވެ.
އަޅުގަނޑުމެން ބެންޗުގައި އެބަތިބި ފުރަތަމަ 11 އަށް އެއްވެސް ޖެހިލުމެއްނެތި ލާން ކެރޭވަރުގެ ޕްލޭޔަރުން. އެކަމަކު އެ ކުޅުންތެރިން ބޭނުންކުރާއިރު ނަތީޖާ ނެރެންވެސް އެބަޖެހޭ، އަޅުގަނޑުމެންނަކީ ވަކި ޕްލޭޔަރަކަށް ބަލާނެ ބައެއް ނޫން. ވެލެންސިއާ ސްކޮޑަކީ ވަކި މީހަކަށް ސްލޮޓް ހާއްސަކޮށްފައި އިން ސްކޮޑެއް ނޫން. ޕްރެކްޓިހުގައި ރަނގަޅަށް ޕާފޯމް ކުރާ ބަޔަކު މެޗަށް ލަމުންދާނީ.
– ޔުނައިޓެޑް ވިކްޓްރީން ފުރަތަމަ ޑިވިޝަނުގައި އެންމެ ރަނގަޅު ނަތީޖާއެއް ނެރުނުއިރު އެ ޓީމުގެ ހެޑް ކޯޗަކަށް ހުރި އާތީ ބުނެފައިވެެއެވެ.
އާތީ ބުނީ އޭނާ ހަވާލުވެގެން މަސައްކަތް ކުރިއިރު ވެސް ޔުނައިޓެޑް ވިކްޓްރީގައި ރަނގަޅު ސްކޮޑެއް އެކުލަވާލައި ހިތްހަމަޖެހޭ ފުޓްބޯޅައެއް ކުޅެވޭ ކަމަށެވެ. އެކަމަކު މިހާރު އޮތް ޔުނައިޓެޑް ވިކްޓްރީ އޮތީ ގައުމީ ޓީމުގެ ހުނަރުވެރި ދެ ކުޅުންތެރިން ކަމަށްވާ މުހައްމަދު އާރިފް (ބަކާ) އާއި އިސްމާއިލް އީސާ (މެސީ) ފަދަ ކުޅުންތެރިންނާ އެކު ވަރުގަދަކޮށް ކަމަށް ބުނިއެވެ.
ވެލެންސިއާ އިން ވަނީ ފަހު ވަގުތު ދަ ގްރާންޑޭ ސްޕޯޓްސް ކްލަބާ އެކު ވެވުނު އެއްބަސްވުމެއްގެ ތެރެއިން ގައުމީ ޓީމުގެ ގޯލްކީޕަރު މުހައްމަދު ފައިސަލްގެ ސޮއި ހޯދައިފައެވެ. ފައިސަލް ޕްރެކްޓިސްތަކުގައި ބައިވެރިވަމުން އަންނައިރު މެޗުކުޅެވޭ ހާލަތުގައި ހުރި ނަމަ އޭނާ ބޭނުންކުރާނެ ކަމަށް އާތީ ވަނީ ބުނެފަ އެވެ. އާތީ ބުނީ ގަދަ ތިން ޓީމު ތެރޭގައި ގުނާލެވޭ ފެންވަރުގެ ޓީމެއް އޮތް ޔުނައިޓެޑް ވިކްޓްރީ އަތުން މޮޅުވާން ވެލެންސިއާ އިން ވަރަށް ރަނގަޅަށް ކުޅެން ޖެހޭނެ އެވެ.
ދަނޑުމަތީގައި އަޅުގަނޑުމެން ވަރަށް މަސައްކަތްކުރަން ޖެހޭނެ މެޗެއް މިއީ އެ ޓީމު (ޔޫވީ) ބަލިކުރަން ބޭނުމިއްޔާ. ކުރިން މެޗަށް ވުރެން ޔުނައިޓެޑް ވިކްޓްރީ ސްޓްރޯންގްވާނެ.
އާތީ ބުނެފައިވެއެވެ.
ޔުނައިޓެޑް ވިކްޓްރީ (ޔޫވީ) އާއި ވެލެންސިއާ ކުޅޭ މެޗު ފަށާނީ މިއަދު ހަވީރު 4 ޖަހާއިރު އެވެ.
ކޮމެންޓު ފޮނުވާ