ކުރިއަށް އޮތް ރައްޔިތުންގެ މަޖިލިސް ދިމާވާތީ ސްކޫލު ކުދިންގެ އިމްތިހާނު އަވަސް ކުރަން ކުރިން ނިންމި ނިންމުން ބަދަލު ކުރަން ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
"ސަންގު ޓީވީ" އަށް ދެއްވި ހާއްސަ އިންޓަވިއުއެއްގައި ރައީސް ޑރ. މުއިއްޒު ވިދާޅުވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއާ ވާހަކަ ދައްކަައިގެން، އެ އިމްތިހާނުތައް އަވަސް ނުކުރާ ގޮތަށް ހަމަޖައްސާނެ ކަމަށެވެ. އެފަދަ ކަންކަން ރާއްވަވާނީ، ބެލެނިވެރިންނާއި ދަރިވަރުންނަށް ދަތިނުވާ ގޮތަށް ކަމަށް އެމަނިކުފާނު ވިދާޅުވިއެވެ.
ރައްޔިތުންގެ މަޖިލީހުގެ އިންތިހާބު ބާއްވާ ގޮތަށް އިލެކްޝަންސް ކޮމިޝަން (އީސީ) އިން ނިންމާފައި ވަނީ އަންނަ މަހުގެ 21 ގައެވެ.އީސީން ފުރަތަމަ ނިންމީ މި މަހުގެ 17 ވަނަ ދުވަހު މަޖިލިސް އިންތިހާބު ބޭއްވުމަށެވެ. އެކަމަކު، ރޯދަ މަހުގައި އިންތިހާބު ދިމާވާތީ ރޯދަ މަސްތަކުގައި އިންތިހާބު ނުބޭއްވޭ ގޮތަށް އިންތިހާބުތަކާ ބެހޭ އާންމު ގާނޫނަށް މިހާރު ވަނީ ބަދަލު ގެނެސްފައެވެ.
މި ބަދަލާ އެކުގައި އިންތިހާބެއް ރޯދަ މަހަކާ ދިމާވާ ނަމަ، އެ އިންތިހާބު ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުންނެވެ.
އިމްތިހާން އޮންނަ ދުވަސްވަރާ މަޖިލިސް އިންތިހާބު ދިމާވާތީ އިމްތިހާނު އަވަސް ކުރުމަށް މި މަހުގެ ކުރީކޮޅު ސަރުކާރުން ނިންމި އެވެ.
އެޑިއުކޭޝަން މިނިސްޓްރީން މީގެކުރިން ނެރުނު ސާކިއުލާއެއްގައި ބުނީ 2023- 2024 ވަނަ އަހަރުގެ ދިރާސީ ކަލަންޑަރުގައި ގްރޭޑު 7،8 އަދި 9ގެ ދަރިވަރުންގެ އިމްތިހާނު ބޭއްވުމަށް 16 އޭޕްރީލް އިން 27 އަށް ކަނޑައަޅާފައިވީ ނަމަވެސް މަޖިލިސް އިންތިހާބާ ދިމާވާތީ އިންތިހާބު ފަށާ ތާރީހަށް ބަދަލު ގެނެސްފައިވާ ކަމަށެވެ. އަދި އަދި މި މަހުގެ 27 އާއި އަންނަ މަހުގެ 25 އާ ދެމެދު ރަސްމީ ދުވަސްތަކުގައި އިމްތިހާނުތައް ބާއްވާ ނިންމަން އެދުނެވެ.
އިމްތިހާނު އަވަސް ކުރުމަށް ނިންމުމުން ގިނަ އަދަދެއްގެ ބެލެނިވެރިން ވަނީ އެކަމާ ކަންބޮޑުވުން ފާޅުކޮށްފައެވެ. އެގޮތުން ކުދިންނަށް އިމްތިހާނަށް ތައްޔާރުވާން ވަގުތު ނުލިބޭނެ ކަމަށް ބައެއް ބެލެނިވެރިން ބުނެފައިވެއެވެ.
