ގްރީން ސްޓްރީޓް ކުރިން މެޗުގައި ނެރުނު ނަތީޖާއެއް މުހިއްމު ނޫން: ނިޒާމް

ދިރާގު ދިވެހި ލީގުގައި މާދަމާރޭ ގްރީން ސްޓްރީޓްސް ދެކޮޅަށް ނުކުންނައިރު އެޓީމުން ކުރިން މެޗުގައި ނެރެފައިވާ ނަތީޖާ މުހިންމު ނޫންކަމަށް މާޒިޔާގެ ކޯޗު މުހަންމަދު ނިޒާމް ބުނެފިއެވެ.

އެންމެ ފަހުގެ ލީގު ޗެމްޕިއަން މާޒިޔާ އިން ވަނީ މި ފަހަރުގެ ލީގުގައި ކުޅުނު ފުރަތަމަ މެޗުން ވަރުގަދަ ސްކޮޑަކާ އެކު ނުކުތް ޔުނައިޓެޑް ވިކްޓްރީ (ޔޫވީ) 4-0 އިން ބަލިކޮށްފައެވެ. ލީގުގެ ދެ ވަނަ މެޗުގައި މާޒިޔާ މާދަމާރޭ 9 ޖަހާއިރު ނުކުންނާނީ ގްރީން ސްޓްރީޓްސްއާ ދެކޮޅަށެވެ. ގްރީން ސްޓްރީޓްސް ފުރަތަމަ މެޗުން ވަނީ 1-0 އިން ވެލެންސިއާ އަތުން ބަލިވެފަ ވެ.

މާޒިޔާ ކޯޗެއްގެ ގޮތުގައި ހުންނައިރު އެންމެ ހިތްހަމަޖެހޭ އެއް ކަމަކީ ކުޅުންތެރިންގެ ކޮމްބިނޭޝަނާއި ދޭދޭ ކުޅުންތެރިންގެ މެދުގައި އެ އޮންނަ ގުޅުން ވަރުގަދަވުން ކަމަށް ނިޒާމް ބުނިއެވެ. މާޒިޔާގެ ބިދޭސީ ޑިފެންޑަރު ޕީޓަ ޕްލަނިޗް އާއި ފޯވާޑް ކޮނޭލިއަސް ސްޓެވާޓް 90 މިނިޓަށް ބޭނުންކުރާނީ އެ ދެ ކުޅުންތެރިން 100 ޕަސެންޓް ފިޓްވުމުން ކަމަށް ނިޒާމް ވަނީ ބުނެފައެވެ.

މީގައި މުހިއްމީ ކުރިއަށް އޮތް މެޗަށް ޓީމު މަސައްކަތްކުރާނެ ގޭމްޕްލޭން އަކާ ޓެކްޓިކްސް އަކަށް މަސައްކަތްކުރުން. އެއްގޮތަކަށް ވެސް އެ ޓީމު (ގްރީން ސްޓްރީޓްސް) އިން ކުރިން މެޗުގައި ނެރުނު ނަތީޖާއެއް މުހިއްމު ނޫން. އެ މީހުން ކުޅޭ ގޭމާއި ގޭމްޕްލޭން އަދި ޓެކްޓިކްސް އަށް ބަލާއިރު އެއީ ރަނގަޅު ޓީމެއް.

– ނިޒާމް ބުނެފައިވެއެވެ.

ނިޒާމް ބުނީ އުމެއިރަކީ ރާއްޖޭގެ ފުޓްބޯޅައިގައި ގޯލްކީޕަރު ނޫން ހުރިހާ މަގާމެއްގައި ވެސް ރަނގަޅު ކުޅުމެއް ދައްކާފައިވާ ކުޅުންތެރިއެއް ކަމަށާއި އޭނާގެ ތަޖުރިބާގެ ބޭނުން މާޒިޔާގެ ސްކޮޑާއި ވަކިވަކި ކުޅުންތެރިންނަށް ވެސް ހިފޭނެ ކަމަށެވެ.

އޭނަ (އުމެއިރު) އަކީ އޯވަރޯލް ޕްލޭޔަރެއްކަން އެބަ އެނގޭ. އޭނަގެ އެކްސްޕީރިއަންސަށް ބަލާއިރު އޭތި ވަރަށް ރަނގަޅަށް ކުޅުންތެރިންނާ ހިއްސާކުރާކަން ފާހަގަކުރެވޭ.

– ނިޒާމް ބުނެފައިވެއެވެ.

މި ފަހަރު މާޒިޔާ ކުޅުނު ދެ މެޗުގައި ވެސް އުމެއިރު ވަނީ ރަނގަޅު ކުޅުމެއް ދައްކައިފަ އެވެ.