ރައީސް ޑރ. މުހައްމަދު މުއިއްޒު ސަރުކާރުގެ ވަޒީރުންނަށް ރުހުން ދޭން ޖެހޭ ކަމަށާއި ވަޒީރުންނަށް ރުހުން ނުދެއްވައި މަޖިލިހަށް ކުރިމަތިލައްވައިގެން ރައްޔިތުން ގާތަށް ވަޑައިގަތުމުގެ ބޭނުމެއް ނެތް ކަމަށް ޖުމްހޫރީ ޕާޓީ (ޖޭޕީ) ގެ ލީޑަރު ގާސިމް އިބްރާހިމް މިއަދު ވިދާޅުވެއްޖެއެވެ.
މަޖިލިހުގެ ދައުރުން ބޭރުން ބޭއްވި ޖަލްސާގައި މާމިގިލީ ދާއިރާގެ މެމްބަރުކަން ކުރައްވަމުން ގެންދަވާ ގާސިމް ވިދާޅުވީ ވަޒީރުންނަށް ރުހުން ދިނުމާ ގުޅޭ ގޮތުން މަޖިލިހުގެ މިނިވަން މުއައްސަސާތަކާ ބެހޭ ކޮމިޓީން ނިންމި ނިންމުމަށް މަރުހަބާ ދަންނަވާ ކަމަށެވެ. މަޖިލިހުގެ ކޮމިޓީން ވަޒީރުންނަށް ރުހުން ދޭން ނުޖެހޭ ސަބަބެއް ނެތް ކަމަށް ނިންމުމަކީ މަޖިލިހުގެ ހުރިހާ މެމްބަރުން ވެސް ވަޒީރުންނަށް ރުހުން ދޭން ޖެހޭ ސަބަބެއް ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވި ގޮތުގައި 2008 ވަނަ އަހަރާއި 2013 ވަނަ އަހަރާއި 2018 ވަނަ އަހަރު އުފެދުނު ސަރުކާރުގައި ވެސް ރައީސުލްޖުމްހޫރިއްޔާ ފޮނުއްވި ފުރަތަމަ ކެބިނެޓަށް މަޖިލިހުން ވަނީ ރުހުން ދީފައެވެ. ގާނޫނުއަސާސީގައި ވަޒީރުންނަށް ރުހުން ނުދޭން ނޯންނަ ކަމަށާއި މީގެކުރިން އަމަލު ކުރި ގޮތަށް ބަލާފައި ރައީސް ޑރ. މުއިއްޒު ސަރުކާރުގެ ކެބިނެޓަށް ރުހުން ދިނުމަކީ ކުރަން ޖެހޭ ކަމެއް ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވީ އިކޮނޮމިކް މިނިސްޓަރު މުހައްމަދު ސައީދާއި ހައުސިން މިނިސްޓަރު އަލީ ހައިދަރާއި ފޮރިން މިނިސްޓަރު މޫސާ ޒަމީރާއި ބަންޑާރަ ނައިބު އަހުމަދު އުޝާމް ފަދަ ވަޒީރުންނަށް ރުހުން ނުދޭން އުޅޭ ވާހަކަ އަޑު އައްސަވާފައިވާ ކަމަށެވެ. އެކަމަކު، އެ ބޭފުޅުންނަކީ ތައުލީމީ ގޮތުން ގާބިލް ނޫން ބައެއްތޯ ނުވަތަ ގާނޫނުއަސާސީގައި ބަޔާން ކުރާ ޝަރުތުތައް ފުރިހަމަ ނުވާ ބައެއްތޯ ގާސިމް ސުވާލު ކުރެއްވިއެވެ. އޭނާ ވިދާޅުވި ގޮތުގައި އެމްޑީޕީގެ ވެރިކަން ބަދަލުކޮށްފައި ވަނީ އެ ސަރުކާރަށް އިތުބާރު ނެތީމައެވެ.
"ރައީސުލްޖުމްހޫރިއްޔާ ފޮނުއްވާފައިވާ ބޭފުޅަކަށް ރުހުން ނުދިނުމަކީ ގައުމު އިނދަ ޖައްސާލުމާއި ގައުމު ހަލާކު ކުރުމަށް ތިޔަބޭފުޅުން ކުރައްވާ މަސައްކަތް. ތިޔަބޭފުޅުންގެ އަމިއްލަ އެދުން ނެރުއްވައިގެން ކުރައްވާ މަސައްކަތް ކަން ޔަގީން.
އެހެންވެ މި ސަބަބުތަކަށްޓަކައި ދަންނަވަން އޮތީ ތިޔަބޭފުޅުން އެއްގޮތަކަށް ވެސް ތިގޮތަކަށް ހަދައިގެން ވާކަށް ނެތޭ. ގައުމު ވަރަށް ނިކަމެތިކަމާއި ވޭނުގައި މިއޮތީ. ދަރަނިތައް އިންތިހާ ދަރަޖައަށް ބޮޑުވެފައިވާ ދަނޑިވަޅެއްގައި މިގޮތަށް އަޅުގަނޑުމެން ޖެއްސުންކޮށްގެން މި ކުރާ ކަންކަމުގެ ސަބަބުން ރައްޔިތުންނަށް އެއްވެސް ކުރިއެރުމެއް ނެތް،" ގާސިމް ވިދާޅުވިއެވެ.
ގާސިމް ވިދާޅުވީ، ވަޒީރުންނަށް ރުހުން ނުދިނުމަކީ ރައްޔިތުން ނިންމާފައިވާ ނިންމުމުގައި "ކޮޅުފައިން" ޖެހުން ކަމަށެވެ. އެމްޑީޕީއިން ކުރިޔަސް އަދި ޑިމޮކްރެޓްސް އިން ކުރި ކަމަށް ވިޔަސް އެއީ ވަރަށް ހަޑި ހުތުރު ކުރަން ހެޔޮވާވަރުގެ ކަމެއް ނޫން ކަމަށް އޭނާ ވިދާޅުވިއެވެ.
"އެތައް ބޮޑު ޕަސަންޓަކުން ތިބޭފުޅުންނަށް ސުޕަމެޖޯރިޓީ އޮއްވައި އެކަން ހަލާކުކޮށްލާފައި ތިބޭފުޅުންނަށް ދެން ވެސް އިތުރަށް ހަލާކުކޮށްލަން އުޅުއްވާނެ ކަމެއް ނެތޭ ޑިމޮކްރެޓުންނޭ ކިޔައިގެން ބަޔަކު އުފައްދައިގެން މިތަނަށް ނުކުމެގެން، އަމިއްލަ ގަޔަށް ވަޅި ހަރައިގެން އުޅޭނެ ކަމެއް ނެތް،" ގާސިމް ވިދާޅުވިއެވެ.
"މިއަދު މި ރައްޔިތުންގެ މަޖިލީހުން އެބަ ޖެހެޔޭ ހުރިހާ ވަޒީރުންނަށް ރުހުން ދެއްވަން. އެހެން ނުދީފި ހާލަތެއްގައި އޭގެ މާނައަކި ރައްޔިތުން ނިންމި ނިންމުން ބަލައިނުގަނެ، ކޮޅުފައިން ޖަހާފައި މާދަމާ ނިކުމެ ރައްޔިތުންގެ މަޖިލީހަށް ކުރިމަތި ލައިގެން ދާނެ ކަމެއް ނެތް ޕާޓީތަކަކުން،" ގާސިމް ވިދާޅުވިއެވެ.
ގާސިމް ވިދާޅުވީ ރުހުން ދިނުމަށް ފަހު، ވަޒީރުން ގޯހެއް ހަދައިފި ނަމަ، އެމީހުންގެ މައްސަލަ މަޖިލިހަށް ހުށަހަޅައިގެން ކުރިއަށް ގެންދެވިދާނެ ކަމަށެވެ.
