ޓޫރިޒަމް ދާއިރާގެ މަސައްކަތްތެރިންގެ ހައްގުތަކަށް ވަކާލަތުކުރާ ޖަމިއްޔާ، ޓޫރިޒަމް އެސޯސިއޭޝަން އޮފް މޯލްޑިވްސް (ޓީމް) އިން ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއިދު ކުރަން ނިންމައިފި އެވެ.
ޓީމްއިން ރޭ ނެރުނު ބަޔާނެއްގައި ބުނީ ރައީސް ސޯލިހުގެ ފަސް އަހަރު ފެނިގެން ދިޔާއީ މީގެ ކުރިން އެއްވެސް ދައުރެއްގައި ކޮށްފައި ނުވާ ވަރަށް ރިސޯޓުތަކުގެ މަސައްކަތްތެރީންގެ ހައްގުތައް ރައްކާތެރިކުރަން މަސައްކަތްކޮށް އެއްބާރުލުން ދީފައިވާ ފަސް އަހަރުގެ ގޮތުގައި ކަމަށެވެ.
އެގޮތުން މަސައްކަތްތެރީންގެ ބައިވެރިވުމާ އެކު މިނިމަމް ވޭޖް ކަނޑައެޅުމުގެ މުހިންމު ސިޔާސަތު ތަންފީޒުކޮށް ރިސޯޓުތަކުގެ މުވައްޒަފުންގެ މުސާރައަށް ބޮޑު ކުރިއެރުމެއް ލިބުނުކަން ވެސް ފާހަގަ ކޮށްފައި ވެއެވެ. އޭގެ އިތުރުން 10 ޕަސެންޓް ސާވިސް ޗާޖު ނެގުން ލާޒިމުކޮށް އެކަން މޮނިޓާ ކުރުމުގެ ނިޒާމު ހަރުދަނާކޮށް، ގާނޫނަށް އިސްލާހު ގެނެސް ގަވައިދު އެކުލަވާލިކަން ފާހަގަ ކޮށްފައި ވެއެވެ.
މި ޖަމިއްޔާގެ ގިނަ މެމްބަރުން މި ދެންނެވި ކަންކަން ބަލައިގަންނަ ކަމާއި އަދި ކުރިއަށް މިއޮތް ދައުރުގައި ޓޫރިޒަމް ދާއިރާގެ މަސައްކަތް ތެރިންނަށް ހާއްސަކޮށް މުހިންމު ސިޔާސަތުތަކެއް އެކުލަވާލައިފައިވާތީ ކުރިއަށް މިއޮތް ރިޔާސީ އިންތިހާބުގައި ރައީސް ސޯލިހަށް ތާއިދުކުރަން ނިންމާފައިވާ ކަމުގައި ދަންނަވަމެވެ.
– ޓީމްގެ ބަޔާނުގައި ވެއެވެ.
ހަމަ އެހެންމެ ހަމައެއް ލަމައެއް ނެތި ކުރިން ވަޒީފާއިން ވަކިކުރުން ހުއްޓުވުމަށް ގާނޫނު އިސްލާހުކޮށް ގަވައިދު އެކުލަވާލައިފައިވާ ކަމަށެވެ. ޓީމްއިން ދެން ފާހަގަ ކުރި އެއް ކަމަކީ ރިސޯޓު މުވައްޒަފުން އެދުނު ގޮތަށް ސްކޫލު ޗުއްޓީ ވެސް މި ސަރުކާރުން ބަދަލުކޮށްދިނުމެވެ.
